ბურჯანაძემ ახალციხეში გამოსვლის დიდი ნაწილი საქართველო-რუსეთის ურთერთობებზე საუბარს დაუთმო

საქართველო-რუსეთის ურთერთობებზე საუბარს ნინო ბურჯანაძემ გამოსვლის დიდი ნაწილი დაუთმო.

„ქვეყნის 20%, სააკაშვილის წყალობით, მყარად აქვს ოკუპირებული რუსეთის ჯარებს. დღეს საქართველოში ყოველდღე მავთულხლართები ინაცვლებს ქვეყნის შიგნით და კაცი პატრონი არაა, რომ ყურმილი აიღოს და რუსეთის ხელისულებას დაელაპარაკოს. ამიტომ ქვეყანას სჭირდება ადამიანი, რომელიც შეძლებს საგარეო პოლიტიკის დალაგებას, წინააღმდეგ შემთხვევაში ვერც სოციალური, ვერც ჯანდაცვის და ვერც სხვა საკითხი მოგვარდება“, - განაცხადა ბურჯანაძემ.

იგი ამომრჩევლებს დაპირდა, რომ ქვეყანაში ომი აღარასდროს იქნება: „ჩვენი შვილები აღარასდროს წავლენ წინასწარ წაგებულ ომში. გპირდებით, რომ დასავლეთთანაც შევინარჩეუნებთ კარგ ურთიერთობას და აღვადგენთ ურთიერთობებს რუსეთთანაც. შევძლებ ფართომასშტაბიანი მოლაპარაკების წარმოებას, მავთულხლართების ახსნას, ბაზრის გახსნას. ამას აუცილებლად გავაკეთებ!“

მისი თქმით, სააკაშვილმა ქვეყნიდან ძლივს გაყვანილი რუსული ჯარი და ტანკები ისევ საქართველოში დააბრუნა.

„ბურჯანაძეს და მის შვილს შემოჰყავს რუსული სპეცრაზმი და ტანკებიო, ჩემი შემოყვანილი ჯარი არც არავის უნახავს და ვერ ვერასდროს ნახავს, გაყვანილს კი ნახავთ, ამას გპირდებით. მე უნდა გავიყვანო ის ჯარი და ტანკები, რომლებიც სააკაშვილმა და მისმა დამქაშებმა შემოიყვანეს აქ“, - განაცხადა ნინო ბურჯანაძემ.

შეგახსენებთ, ნინო ბურჯანაძე მესხეთს დღეს სტუმრობდა. დღესვე მან განაცხადა, რომ ივანიშვილს საკუთარი კანდიდატურა რომ წამოეყენებინა, მეტი მხარდაჭერა ექნებოდა.

[თამუნა უჩიძე, ახალციხე]