ნინო ბურჯანაძე: 'მარგველაშვილი კარგი ბიჭია, თუმცა, მხოლოდ კარგი ბიჭობა ქვეყნის მართვას არ შველის'

ახალციხეში, თამარ მეფის ძეგლის მიმდებარე ტერიტორიაზე შეკრებილ მხარდამჭერებთან, ნინო ბურჯანაძე დაახლოებით 15:30 საათისთვის მივიდა. აქ მას არა მხოლოდ ახალციხელი, ადიგენელი და ახალქალაქელი მხარდამჭერებიც ელოდნენ.

შეკრებილ მოსახლეობას ჯერ „დემოკრატიული მოძრაობა -ერთიანი საქართველოს“ წევრმა, ნინო ბურჯანაძის საარჩევნო შტაბის ხელმძღვანელმა ირაკლი ბათიაშვილმა მიმართა: „გაიხსენეთ ჩვენი პატრიარქის სიტყვები - დაფიქრდით და ღირსეულს და საუკეთესოს მიეცით თქვენი ხმაო. ეს არის მრავალმნიშვნელოვნად ნათქვამი სიტყვები. სწორედ ახლა უნდა გააკეთოთ თქვენ ის არჩევანი, რომელიც სჭირდება საქართველოს, მავთულხლართებიდან დაწყებული, გაჭირვებული ხალხით დასრულებული. გამოცდილი და მაღალკვალიფიციური ადამიანი გვჭირდება დღეს ქვეყნის სათავეში და ასეთ არის ნინო ბურჯანაძე“.

ბურჯანაძემ ამომრჩევლებს სვეტიცხოვლობა მიულოცა და უსურვა ისეთ გამთლიანებულ საქართველოში ეცხოვროთ, როგორიც ეს თამარის მეფობის დროს იყო. მან თავის გამოსვლაში კოალიცია „ქართული ოცნების“ კანდიდატი გიორგი მარგველაშვილი გააკრიტიკა და განაცხადა, რომ „ის ნამდვილად ჭკვიანი, განათლებული ადამიანი და კარგი ბიჭია, თუმცა მხოლოდ კარგი ბიჭობა ქვეყნის მართვას არ შველის. რამდენჯერმე მოვიწვიე მარგველაშვილი ტელედებატებში და ჩემთან კამათს მოერიდა. ის ჩემთან ვერ ჯდება სასაუბროდ და პუტინს დაელაპარაკება?!“

მისი თქმით, ბიძინა ივანიშვილი მაშინ შეცდა, როცა განაცხადა, რომ ისევე უნდა ენდოს ხალხი მარგველაშვილს, როგორც მას ენდობა: „არ შეიძლება ცოლი, ქმარი და ქვეყნის პრეზიდნეტი სხვისი რჩევით აირჩიო“.

მან წლების განმავლობაში არსებულ ტერორზე ისაუბრა და განაცხადა, რომ სამცხე-ჯავახეთში არათუ როგორც პოლიტიკოსი, არამედ როგორც მოქალაქე, ჩამოსვლას ერიდებოდა. რადგან შესაძლოა, ჭირში მისვლის შემთხვევაშიც კი, თუ მას ვინმე ამ რეგიონში ხელს ჩამოართმევდა, პრობლემები შექმნოდა.

მისი განცხადებთ, მას შემდეგ, რაც ქვეყანის სათავეში „ქართული ოცნება“ მოვიდა, არაფერი შეცვლილა. ამიტომ იგი ამომრჩეველს ცხოვრების გაუმჯობესებას და პირველ რიგში, საქართველოს ტერიტორიებიდან რუსული ჯარის გაყვანას, ასევე, მავთულხლართების აღებას დაჰპირდა. ამ და სხვა დაპირებების მოსმენის შედეგ შეხვედრა კითხვა პასუხის რეჟიმში წარიმართა.

ბურჯანაძე ახალციხეში ერთ საათზე მეტ ხანს გაჩერდა. ახალციხემდე ბურჯანაძე ხაშურელ ამომრჩეველს შეხვდა.

[თამუნა უჩიძე, ახალციხე]