ბურჯანაძის შეფასებით, მერაბიშვილი 'სანატორიუმში დასასვენებლად წამოგორებულს' ჰგავს

„კარგია, რომ აშენდა ციხე, მაგრამ რის ფასად?! უამრავი რამ აშენდა საბჭოთა კავშირში 30-იან წლებში, გიგანტური ქარხნები და ჰესები, მაგრამ რის ფასად?! მილიონობით ადამიანის მონური შრომის ფასად. შრომას ფასი მაშინ აქვს როდესაც ამას ადამიანების ღირსება, ოჯახები და ბედი არ ეწირება“, - განაცხადა პრეზიდენტობის კანდიდატმა.

მისივე თქმით, დღეს „ქართული ოცნება“ „ნაციონალების“ მიერ წართმეული წილების გადაფორმებითაა დაკავებული და არაფერი გააკეთეს იმისთვის, რომ ვინმე დასჯილიყო.

„აბსოლუტური უსუსურობაა პროკურატურაში. თუ ვანო მერაბიშვილს იმის მეტი დანაშაული არაფერი აქვს, რომ სოციალურ აგენტებს ფული მისცა ბიუჯეტიდან, მაშინ ის არ უნდა იჯდეს ციხეში, - აცხადებს ბურჯანაძე და ამატებს, - ადამიანს, რომელსაც დატერორებული ჰყავდა მთელი საქართველო, რომელმაც 26 მაისი დაგეგმა, ისე, რომ წინასწარ ჰყავდა ადამიანები განწირული ჩასახოცად, რომლის სინდისზეცაა გახმაურებული მკვლელობები, როგორ ვერ უნდა მოახერხო ხელისუფლებამ, ერთი ნორმალური ბრალდება დაუდო წინ, რომ ფეისბუქით ციხიდან ყოველდღე არ გვეხმაურებოდეს, გეგონება სანატორიუმშია დასასვენებლად წამოგორებული“.

შეგახსენებთ, ნინო ბურჯანაძე მესხეთს დღეს სტუმრობდა. დღესვე მან განაცხადა, რომ ივანიშვილს საკუთარი კანდიდატურა რომ წამოეყენებინა, მეტი მხარდაჭერა ექნებოდა, რადგან, 'მარგველაშვილი კარგი ბიჭია, თუმცა, მხოლოდ კარგი ბიჭობა ქვეყნის მართვას არ შველის. ბურჯანაძე ამომრჩეველს დაპირდა, რომ "დასავლეთთანაც შევინარჩეუნებთ კარგ ურთიერთობას და აღვადგენთ ურთიერთობებს რუსეთთანაც".

[თამუნა უჩიძე, ახალციხე]