ბურჯანაძე: ‘ივანიშვილს რომ საკუთარი კანდიდატურა წამოეყენებინა, მეტი მხარდაჭერა ექნებოდა’

„ოცნების“ სიკეთე და ივანიშვილის შეცდომა

„დემოკრატიული მოძრაობა - ერთიანი საქართველოსთვის“ პრეზიდენტობის კანიდიდატმა, ნინო ბურჯანაძემ დღეს, 14 ოქტომბერს, მესხ ამომრჩეველთან გამოსვლისას საუბარი „ქართული ოცნების“ კრიტიკით დაიწყო. თუმცა აღნიშნა, რომ ძალიან მნიშვნელოვანია ის, რაც ქვეყანაში გასული წლის პირველ ოქტომბერს მოხდა.

„წელიწადნახევრის წინ თქვენთან შეხვედრა არ შემეძლო. ასე რომ მოვქცეულიყავი, ამ შეხვედრის შემდეგ ან ნარკოტიკს გინახავდნენ ჯიბეში და ან იარაღს, ან შვილს დაიჭერდნენ, ან მამას, ან სამსახურიდან გამოგაგდებდნენ. დღეს ეს ასე აღარაა და ამიტომ ეს ნამდვილად დასაფასებელია“, - განაცხადა ბურჯანაძემ.

მისი თქმით, ბიძინა ივანიშვილმა დიდი შეცდომა დაუშვა, როცა პრეზიდენტობის კანიდადატად გიორგი მარგველაშვილი დაასახელა და თქვა, რომ ისე უნდა ენდოს ამომრჩეველი მარგველაშვილს, როგორც მას ენდობიან: „ივანიშვილს რომ საკუთარი კანდიდატურა წამოეყენებინა, მეტი მხარდაჭერა ექნებოდა, მაგრამ, მისი ხათრით პრეზიდენტს ნამდვილად ვერ ავირჩევთ“.

ფორმულა, რომელიც ხელფასების რაოდენობას დაარეგულირებს

ბურჯანაძემ ყურადღება ხელფასებისა და პენსიების რაოდენობაზეც გაამახვილა. მას მიაჩნია, რომ დაუშვებელია მინისტრის ხელფასი 50-ჯერ მეტი იყოს მასწავლებლის ხელფასზე. ამიტომ უნდა შედგეს ფორმულა ისე, რომ მინისტრის ხელფასი მიბმული იყოს პენსიაზე და საარსებო მინიმუმზე.

„დღეს ათასობთ ოჯახს გამოსახლება ელოდება საბანკო ვალების გამო, არავინ ამბობს, რომ ბანკები უნდა დავაქციოთ, მაგრამ, როდესაც ბანკებში ხელფასების რაოდენობა 10 და 13 ათასი ლარია, ეს მახინჯი სისტმა უნდა მოიშალოს. 13 ათასი ლარი ჩვენი მოსახლეობის აბსოლუტურ უმრავლესობას მთელი წელი არ აქვს შემოსავალი“, - განაცხადა ახალციხეში ვიზიტად მყოფმა ნინო ბურჯანაძემ.

[თამუნა უჩიძე, ახალციხე]