პროკურატურა კვლავ ხვედელიანის საქმეზე მუშაობს

სასამართლოს გადაწყვეტილება პროკურატურაში გუშინ მიიღეს, რადგან გადაწყვეტილება დიდია, როგორც პროკურატურაში გვიხსნიან მის გაცნობასა და დამუშავებას დრო სჭირდება.

სამცხე-ჯავახეთის ოლქის პროკურორის გიორგი პაპუაშვილის განცხადებით, ეს გადაწყვეტილება საქმის მასალებთან უნდა შეჯერდეს: „ამის შემდეგ მივიღებთ გადაწყვეტილებას, თუ როგორ და რა ფორმით გავასაჩივრებთ“.

პაპუაშვილის განმარტებით, პროკურატურას გადაწყვეტილების გასაჩივრებისათვის ვადა ერთი თვე აქვს: „გონივრულად გამოვიყენებთ ამ პერიოდს და მაქსიმალურად ზუსტად, ობიექტურად და მიუკერძოებლად ჩამოვაყალიბოთ ჩვენი პოზიცია ამ საქმესთან დაკავშირებთ“.

შეგახსენებთ, რომ ბორჯომის პოლიციის ყოფილ უფროსსა და „ნაციონალების“ მაჟორიტარი დეპუტატობის კანდიდატს მამუკა ხვედელიანს, ასევე მის 4 თანამშრომელს ბრალი მამაკაცის გაუპატირებასა და არაადამიანურ მოყრობაში ედებოდა. 8 თვის განმავლობაში საქმის წარმოების შემდეგ, მეოცე სასამართლო პროცესზე, 3 ივლისს ახალციხის რაიონულმა სასამართლომ პოლიციის ყოფილ თანამშრომლებს გამამართლებელი განაჩენი გამოუტანა. მოსამართლე გოჩა ჯეირანაშვილმა ყოფილი ბრალდებულები სასამართლო დარბაზიდან გაათავისუფლა. ხვედელიანის გამამართლებელ განაჩენს საპროტესტო აქციების ტალღა მოჰყვა.

[თამუნა უჩიძე, ახალციხე]