საქართველოს მთავარი პროკურატურა ხვედელიანის საქმეზე განცხადებას ავრცელებს

საქართველოს მთავარი პროკურატურა ახალციხის რაიონული სასამართლოს მიერ ბორჯომის პოლიციის ყოფილი უფროსისა და მასთან ერთად ბრალდებული 4 პირის გათავისუფლებასთან დაკავშირებით განცხადებას აკეთებს.

„განაჩენის გამოტანამდე რამდენიმე დღით ადრე, მოსამართლე გოჩა ჯეირანაშვილი, მისი ინიციატივით, არაოფიციალურ ვითარებაში შეხვდა სამცხე-ჯავახეთის პორკურორს გივი პაპუაშვილს და ურჩია, რომ ბრალდებულებთან გაეფორმებინა საპროცესო შეთანხმება მათი გათავისუფლების მოთხოვნით. მოსამართლის სიტყვებით „ეს ყველასთვის კარგი გამოსავალი იქნებოდა“. პროკურორმა მის ამ შეთავაზებას უარით უპასუხა“, - განაცხადა საქართველოს მთავარი პროკურატურის პრეს-სამსახურის უფროსმა ხათუნა პაიჭაძემ.

შეგახსენებთ, ბორჯომის პოლიციის ყოფილი უფროსი და „ნაციონალური მოძრაობის“ დეპუტატობის კანდიდატი ბორჯომში მამუკა ხვედელიანი და მის საქმეში ოთხივე ბრალდებული: სერგო სამსონიძე, ალექსანდრე ბლიაძე, გიორგი ლომიძე და გიორგი ბლიაძე, რომელთაც მამაკაცის სკამის ფეხით გაუპატიურებაში ედებოდათ ბრალი, ახალციხის რაიონულმა სასამართლომ გუშინ, 3 ივლისს უდანაშაულოდ სცნო და სასამართლო დარბაზიდან გაათავისუფლა.

დღეს, 12.00 საათზე, ბორჯომში მათი ციხეში დაბრუნების მოთოვნით საპროტესტო აქცია გაიმართა. აქციის მონაწილეები აქციის გამართვას ხვალ ახალციხის რაიონულ სასამართლოსთან გეგმავენ.

რაზე ისაუბრეს ჯეირანაშვილმა და პაპუაშვილმა, "სამხრეთის კარიბჭე" რამდენიმე წუთში გაცნობებთ.

[Sknews.ge]