ხვედელიანის საქმეში ბრალდებული საპატიმროს დატოვებს

ბორჯომის პოლიციის ყოფილი თანამშრომლის ზ. ლ-ს ადვოკატმა ირაკლი ბარძიმაძემ აღკვეთის ღონისძიების შეცვლაზე შუამდგომლობა ახალქალაქის რაიონულ სასამართლოში, დღეს გამართულ მორიგ სასამართლო პროცესზე დააყენა.

„გასულ პროცესზე, პროკურორების დაკითხვისას, შევქმენი საფუძველი, რომ აღკვეთის ღონისძიების შეცვლაზე შუამდგომლობა დამეყენებინა. პატიმრობის შეცვლა 10 ათასი ლარის საპატიმრო გირაოთი მოვითხოვე და მოსამართლემ შუამდგომლობა დამიკმაყოფილა“, - ამბობს ბარძიმაძე და ამატებს, რომ როგორც კი გირაოს უზრუნველყოფას შეძლებენ ზ.ლ. ციხეს დატოვებს.

ზ.ლ. შვიდი თვეა რაც პატიმრობაში, გლდანის მერვე საპყრობილეში იმყოფება. მას ბრალდების მხარე ყალბი ჩანაწერის გაკეთებასა (სსკ-ის 341-ე მუხლი) და ურთიერთსაწინააღმდეგო ჩვენების მიცემას ( სსკ-ის 371-ე მუხლი) ედავება.

იგი 2013 წლის 19 ოქტომბერს იმ საქმის გამო დააკავეს, რომელზეც ბორჯომის პოლიციის ყოფილ უფროსს მამუკა ხვედელიანსა და მის თანამშრომლებს ახალციხის რაიონულმა სასამართლომ ამავე წლის 3 ივლისს გამამართლებელი განაჩენი გამოუტანა.

მოგვიანებით, 17 დეკემბერს იგივე ეპიზოდზე გამამართლებელი განაჩენი გამოიტანა თბილისის სააპელაციო სასამართლომაც. საქმე ახალდაბის ეპიზოდს ეხება, რომლის თანახმადაც 2011 წლის 27 მაისს ახალდაბაში რესტორან „ბურჯებში“ მომხდარი ჩხუბის გამო 3 პირი დააკავეს და ადმინისტრაციული პატიმრობა შეუფარდეს.

ირაკლი ბარძიმაძე აცხადებს, რომ პოლიციის ყოფილი თანამშრომელი ზ.ლ. ბორჯომის პოლიციის ყოფილი უფროსის მამუკა ხვედელიანის საქმეში ყალბ მოწმედ სჭირდებოდათ და ამიტომ დააკავეს.

[თამუნა უჩიძე, ახალციხე]