ახალციხის სამედიცინო დაწესებულებას ახალი სპეციალისტები დაემატა [R]

როგორც ჩვენთან საუბარში „უნიმედი-სამცხეს“ ახალციხის სამედიცინო დაწესებულების დირექტორი აცხადებს, ჩამოყალიბდა ახალი გუნდი, რომელიც საკმაოდ აქტიურად უძღვება სამკურნალო პროცესებს.

„ერთ-ერთი ყველაზე მნიშვნელოვანი წარმატება, რაც ამ ბოლო პერიოდში გვქონდა ისაა, რომ ჩვენი ქსელის ლაბორატორიებს ხარისხის სერტიფიკატი მიენიჭა. გარდა ამისა, ძალიან მალე ველოდებით აისო სერტიფიკატის მონიჭებასაც“, - ამბობს „უნიმედი-სამცხეს“ ახალციხის სამედიცინო დაწესებულების დირექტორი ლადო გელაშვილი.

ერთ-ერთი განყოფილება, რომელსაც ახალი ხელმძღვანელი ჰყავს სამეანო-გინეკოლოგიური განყოფილებაა. ვასილ ძინძიბაძე ახალციხის სამედიცინო დაწესებულებაში უკვე ორი თვეა მუშაობს. დაწესებულებაში ამბობენ, რომ ამ დროის განმავლობაში მშობიარეთა მომართვიანობამ იმატა.

„აქამდე ოპერაციების გარკვეული ნაწილი ამ დაწესებულებაში არ კეთდებოდა, ვინაიდან შესაბამისი სპეციალისტები არ იყვნენ. დღეს კი არ არსებობს ისეთი ოპერაცია, რომელიც ახალციხის სამედიცინო დაწესებულებაში არ კეთდება“, - ამბობს ვასილ ძინძიბაძე.

სამეანო-გინეკოლოგიურ განყოფილებაში ოთხი ქვეგანყოფილებაა: სამშობიარო, ორსულთა პათოლოგია, გინეკოლოგია და ქალთა კონსულტაცია. როგორც დაწესებულებაში ამბობენ, განყოფილება ყველა საჭირო აპარატურითაა აღჭურვილი.

„დღე-ღამის ნებისმიერ საათში შეგვიძლია პაციენტს შესაბამისი მომსახურება გავუწიოთ. გვაქვს უახლესი აპარატურა და ყველაფერი, რაც მეანობა-გინეკოლოგიაში გამოიყენება“, - ამბობს სამეანო-გინეკოლოგიური განყოფილების გამგე და ამატებს, რომ ცოტა ხნის წინ სამედიცინო დაწესებულების ადმინისტრაციამ ახალი საოპერაციო ბლოკი გამოყო, რომელიც ყველანირი აღჭურვილობითაა უზრუნველყოფილი.

„უნიმედი-სამცხეს“ ახალციხის სამედიცინო დაწესებულებაში თვეში საშუალოდ 50-ზე მეტი ახალშობილი ჰყავთ.

„მკაცრად განისაზღვრება საკეისრო კვეთის შემთხვევებიც. ამიტომ, მხოლოდ მშობიარეს სურვილით, თუ მას გარკვეული ჩვენებები არ აღენიშნება, საკეისრო კვეთა არ კეთდება“, - ამბობს ექიმი ვასილ ძინძიბაძე და ქალბატონებს მოუწოდებს, რომ ექვს თვეში ერთხელ გინეკოლოგთან კონსულტაციაზე აუცილებლად მივიდნენ.

[sknews.ge]