ახალციხე 'კულტურათა გაცნობის დღესასწაულს' უმასპინძლებს

ღონისძიება, რომელიც ახალციხის ახალგაზრდული ცენტრის ორგანიზებით ტარდება, 14:00 საათზე დაიწყება. მას სამოქალაქო განათლებისა და პედაგოგთა გადამზადების პროგრამის ხელმძღვანელები, ახალგაზრდული ცენტრის წარმომადგენლები, პროგრამაში მონაწილე სამცხე-ჯავახეთის არაქართული და ქართული საჯარო სკოლის მოსწავლეები, მასწავლებლები და მშობლები დაესწრებიან. ღონისძიებაზე მიწვეული არიან ადგილობრივი თვითმმართველობის წარმომადგენლებიც.

ღონისძიების ფარგლებში ახალციხის ციხის საკონფერენციო დარბაზში სხვადასხვა სამოქალაქო კლუბის წევრები თემატურ ნახატებს და ტრადიციულ კერძებს გამოფენენ, მიწვეულ სტუმრებს ორენოვანი (სომხურ-ქართული) საინფორმაციო ბუკლეტები დაურიგდებათ, რომელიც ახალგაზრდულ ცენტრში დამზადდა.

ღონისძიების მონაწილეები კულტურათა მრავალფეროვნების შესახებ მომზადებული პროგრამების პრეზენტაციას მოაწყობენ. შემდეგ კი მოეწყობა თემატური ლექსებისა და სლაიდების პრეზენტაცია. დასასრულს ღონისძიების მონაწილეები ახალციხის ციხეს დაათვალიერებენ.

[sknews.ge]