ახალციხეში ახალგაზრდული ფესტივალი ჩატარდა

ახალგაზრდული ფესტივალი ახალციხის ახალგაზრდული ცენტრმა სამოქალაქო განათლების პროგრამის „მომავლის თაობა“ ფარგლებში ჩაატარა. მასში სამცხე–ჯავახეთის მასშტაბით პარტნიორი სამოქალაქო კლუბების წევრები მონაწილეობდნენ.

„გვინდა, რომ ჩვენი პროექტის ფარგლებში უფრო გაიზარდოს სამოქალაქო აქტივობებში ახალგაზრდების მონაწილეობა. მხარი დავუჭიროთ, რომ მათ თავისუფალი დრო დახარჯონ ისეთი საქმეების კეთებაში, რომელიც ხელს შეუწყობს აქტიურ მოქალაქეებად ჩამოყალიბებას“, – ამბობს რეგიონალური არასამთავრობო ორგანიზაციათა ქსელის მენეჯერი თამარ ფრუიძე.

ერთდღიანი ფესტივალი, სამოქალაქო კლუბის წევრების მონაწილეობით, ცენტრალური პარკიდან უნივერსიტეტის მეორე კორპუსამდე მსვლელობით გაიხსნა. შემდეგ კი სამცხე–ჯავახეთის სახელმწიფო უნივერსიტეტის საკონფერენციო დარბაზში სამოქალაქო კლუბის წევრების მიერ მომზადებული ვიდეო რგოლების ჩვენება და საკონკურსო ნახატების პრეზენტაცია გაიმართა.

„სამოქალაქო კლუბის წევრებს ჰქონდათ დავალება წარმოედგინათ ორი საკონკურსო ნამუშავერი ნახატისა და ვიდეო–რგოლის სახით. სულ წარმოდგენილი იყო 12 სკოლის 54 ნახატი და 12 ვიდეო–რგოლი“, – განმარტავს ახალციხის ახალგზარდული ცენტრის ხელმძღვანელი მაკა სუდაძე.

კონკურსში სამ–სამი გამარჯვებული სპეციალურად მიწვეულმა ჟიურის წევრებმა გამოავლინეს. სამოქალაქო კლუბის წევრებსა და კონკურსის გამარჯვებულებს სერთიფიკატები და ფასიანი საჩუქრები გადაეცათ.

„ორივე ნომინაციაში გავიმარჯვე, ნახატების კონკურსში წარმოდგენილი მქონდა სოფლად და ქალაქად მცხოვრები ბავშვების ცხოვრება, როგორ ატარებენ ისინი თავისუფალ დროს, ვიდო–რგოლში კი ვაჩვენე როგორ ვატარებ ჩემს თავისუფალ დროს სოფელში“, – ამბობს ახალციხის მუნიციპალიტეტის სოფელ ფერსის საჯარო სკოლის მოსწავლე რიტა გოგოლაური.

ფესტივალის დასასრულს უნივერსიტეტის ეზოში ფლეშ–მობი მოეწყო.



[თამარ თოთაძე, ახალციხე]