სამცხე–ჯავახეთში სამოქალაქო განათლების ახალი პროგრამა იწყება

პროგრამის პრეზენტაცია დღეს, 3 დეკემბერს, ახალქალაქის მუნიციპალიტეტის გამგეობის საკონფერენციო დარბაზში შედგა.
პროგრამაში ჩართული სკოლები მიიღებენ დამხმარე სახელმძღვანელოებს, იგეგმება პედაგოგთა გადამზადება, მხარდაჭერა სასკოლო სამოქალაქო კლუბების შექმნისათვის, მოსწავლეთა ხელშეწყობა სკოლისა და საზოგადოების სასარგებლოდ სხვადასხვა პროექტების განხორციელებაში და სხვა საქმიანობა სამოქალაქო განათლების გაძლიერების მიზნით.

ახალი სამოქალაქო განათლების პროგრამის – „მომავლის თაობა“, განხორციელებას აშშ საერთაშორისო განვითარების სააგენტოს დაფინანსებით, ორგანიზაცია PH International კონსულტაციისა და ტრენინგის ცენტრთან, სამოქალაქო განათლების პედაგოგთა ფორუმთან და 11 რეგიონულ პარტნიორ ორგანიზაციასთან ერთად იწყებს. ახალციხეში პროგრამის პარტნიორი ახალციხის ახალგაზრდული ცენტრია.

პროგრამას მხარს უჭერს საქართველოს განათლებისა და მეცნიერების სამინისტრო. პროგრამა სამი წლის მანძილზე გაგრძელდება და მთელი საქართველოს მასშტაბით 480 სკოლასთან იმუშავებს. პროგრამა „მომავლის თაობა“ ხელს შეუწყობს სამოქალაქო განათლების სასწავლო პროგრამის გაძლიერებას სკოლებში და მოსწავლეების მიერ სამოქალაქო განათლების გაკვეთილზე მიღებული ცოდნის პრაქტიკაში გამოყენებას.

ახალგაზრდებში სამოქალაქო განათლების გაძლიერების გზით პროგრამის საქმიანობა ხელს შეუწყობს სამოქალაქო საზოგადოების როლის გაზრდას გამჭვირვალე და ანგარიშვალდებული მმართველობისათვის.



[sknews.ge]