სოფელ აბასთუმანში რვა ოჯახს ორი თვეა სასმელი წყალი არ აქვს

სოფელ აბასთუმნის მკვიდრი ნათელა ბაბაჯანიანი ამბობს, რომ სასმელი წყლის მაგისტრალის რეაბილიტაციის დასრულების შემდეგ, ონკანებზე წყალი უნდა მისულიყო. თუმცა სამუშაოები ისე დასრულდა, რომ ეს პრობლემა ვერ მოგვარდა.

„ეს უპატრონობაა და მეტი არაფერი. არ ვიცი, საერთოდ, რას აკეთებდნენ. გვითხრეს, რომ სასმელი წყალი უნდა გვქონოდა, მაგრამ ორი თვეა, წაყალი საერთოდ არ გვაქვს. ასაკში ვარ, როგორ წავიდე სოფლის გადაღმა და წყალი მოვიტანო?!“ – გვეუბნება ნათელა ბაბაჯანიანი.

ადგილობრივები ამბობენ, უწყლოდ უბანში რვა ოჯახია, რომელიც იმ მაგისტრალით სარგებლობდა, რომელზეც სამუშაოები მიმდინარეობდა. მათ ახლა, დასალევად და საყოფაცხოვრებოდ, წყლის მოტანა სოფლის სხვა უბნებიდან, ან მეზობელი სოფლიდან უწევთ.

„აქ დასასვენებლად ვარ ბავშვებთან ერთად ჩამოსული, პატარები მყავს, დარეცხვა უნდათ, საჭმლის მომზადება და წყალი საერთოდ არ არის“, – გვეუბნება რიფსიკ სააკიანი.

ადიგენის მერიის მელიორაციის სამსახურის ხელმძღვანელი მამუკა დემეტრაძე ადასტურებს, რომ აბასთუმანში აღნიშნულ უბანში სამუშაოები ნამდვილად მიმდინარეობდა: „აქ ცენტრალური მაგისტარლი უნდა გაგვეკეთებინა და გავაკეთეთ. წყალი გამანაწილებლამდე მივიყვანეთ. ახალა თავიანთ ეზოებში თვითონ უნდა შეიყვანონ, მაგრამ “კიდევ იძახიან პრობლემა არისო. ჯერ უნდა ვნახო“.

მამუკა დემეტრაძის თქმით, იმის დასადგენად, თუ რა პრობლემა აქვს მაგისტრალს, ტექნიკით მიწის გათხრა სჭირდება: „ახლა ტექნიკა სხვა სოფლებში მუშაობს და დრო სჭირდება. ვიდრე იქ არ დაამთავრებს სამუშაოებს, ვერ წამოვიყვან. მერე გავთხრით და თუ რამე პრობლემა იქნება, მოვაგვარებთ.“

[ლუბა გიორგაძე, ადიგენი]