აბასთუმანში დაბინძურებული წყალი მოდის

აბასთუმანში ადგილობრივების თქმით, მეორე კვირაა დაბინძურებული წყალი მოდის.

„როგორც კი იწვიმებს უფრო მეტი ტალახი მოყვება. თითქმის ყოველ გაზაფხულზე ამ დღეში ვართ. წყალს სარეცხის გასარეცხადაც კი ვეღარ ვიყენებთ“, – ამბობს აბასთუმანში მცხოვრები ლილი ზაზაშვილი.

დაბინძურებული წყლის გამო ჩივიან დამსვენებლებიც: „ხუთი დღეა თბილისიდან ჩამოვედი, ბავშვი ჩამოვიყვანე დასასვენებლად, მაგრამ წყალი ისეთი დაბინძურებულია ვერც ვსვამთ და ვერც ვერაფერს ვრეცხავ“, – გვითხრა დალი ბოლქვაძემ.

გაერთიანებული წყალმომარაგების კომპანიაში ამბობენ, რომ აბასთუმნის სათავე ნაგებობა ყოველწელს იწმინდება.

„აბასთუმანში ამ პრობლემის შესახებ არ ვიცოდით, აქამდე ჩვენთან შეტყობინება არ შემოსულა. ვნახავთ სათავე ნაგებობა რა მდგომარეობაშია“, – ამბობს საქართველოს გაერთიანებული წაყალმომარაგების კომპანიის ადიგენის სერვისცენტრის ხელმძღვანელი ბორის სირბილაძე.

ადიგენის მერიაში კი აცხადებენ, რომ მუნიციპალური განვითარების ფონდის დაფინანსებით, სასმელი წყლის რეაბილიტაციისთვის ტენდერი ცხადდება და მიმდინარე წელს კურორტი ახალი სისტემით დაიქსელება, ასევე, მოეწყობა სათავე ნაგებობაც.

„მთლიანად შეიცვლება ყველაფერი, ყველა ადგილობრივს ექნება წყალი და აღარც დაბინძურების პრობლემა იქნება“, – ამბობს ადიგენის მერიის ინფრასტრუქტურის სამსახურის უფროსი გოდერძი სხირტლაძე.

აბასთუმანში სასმელი წყლის რეაბილიტაციისათვის საპროექტო სამუშაოები გაერთიანებული წყალმომარაგების კომპანიამ შეასრულა, მუნიციპალური განვითარების ფონდი კი ტენდერს სამშენებლო სამუშაოებზე გამოაცხადებს.



[ლუბა გიორგაძე, ადიგენი]