ადიგენში რვა სოფელს სასმელი წყალი არ მიეწოდება

ადიგენში, 23 სექტემბერს დილით, კურცხანის სასმელი წყლის სისტემა დაზიანდა, რის გამოც რვა სოფელს – ვარხანს, აბასთუმანს, საღრძეს, ხარჯამს, წახანს, ხევაშენს, ბენარასა და უნწას სასმელი წყლის მიწოდება შეუწყდა.

„სასმელი წლის სისტემის ცენტრალური მილი გასკდა. დაახლეობით დილის შვიდი საათი იქნებოდა. რაც რეზერვუარებში გვქონდა წყალი, ვაწვდიდით მოსახლეობას, მაგრამ ახლა, ვიდრე სარეაბილიტაციო სამუშაოებს არ დავასრულებთ, შეწყვეტილი იქნება“, – ამბობს ადიგენის მელიორაციის სამსახურის ხელმძღვანელი მამუკა დემეტრაძე.

ადიგენის მუნიციპალიტეტის მერიაში ამბობენ, რომ დაზიანებული სასმელი წყლის სისტემაზე სამუშაოები დილიდან მიმდინარეობს და სავარაუდოდ, ხვალ, 24 სექტემბერს, დღის მეორე ნახევარში დასრულდება, რის შემდეგაც სასმელი წყლის მიწოდება აღდგება.

[ლუბა გიორგაძე, ადიგენი]