სოფელ რუსთავში მცხოვრებ 12 ოჯახს წყალი ისევ არ აქვს

სოფელ რუსთავში მცხოვრებ გიორგი წიკლაურის ოჯახს, სასმელი წყლის დაშრობის გამო, მესამე თვეა წყალი არ აქვს და მეზობლებისგან ეზიდება.

„მილები გაიყვანეს, დასრულებული არ არის, ველოდებით შეერთებას. უბრალოდ მილებია ჩაყრილი“, – ამბობს გიორგი წიკლაური.

ასპინძის გამგეობამ სოფელში არსებული სასმელი წყლის გადანაწილების სამუშაოები ორი კვირის წინ დაასრულა. გამგებლის მოადგილის ალექსანდრე პაპაშვილის განმარტებით, გამგეობამ სისტემა გააკეთა, მილები მიწაში ჩაყარა და მოსახლეობამდე მიიყვანა. საბოლოო ჯამში თითოეულ ოჯახს მილები თავად უნდა დაეერთებინათ, თუმცა, რატომ არ დააერთეს მისთვისაც გასაკვირია.

„სამუშაოები დავასრულეთ, მოსახლეობას უბრალოდ უნდა დაეერთებინა თავიანთ მილებზე, რატომ არ გააკეთეს, არ ვიცი. ჩემთვისაც გუშინ გახდა ცნობილი ეს ფაქტი სოფლებში წყალმომარაგების კომპანია არ გვყავს, დღესვე გავაგზავნით გამგებლის წარმომადგენელს და სხვა თანამშრომლებს და ისინი დააერთებენ“, – განაცხადა სატელეფონო საუბარში ალექსანდრე პაპაშვილმა.

მისივე თქმით, იმის გამო, რომ უწყლოდ დარჩენილ ოჯახებს სასმელი წყლის პრობლემა მალე მოგვარებოდათ, ტენდერი არ გამოაცხადეს და პირდაპირი შესყიდვის წესით შეიძინეს მილები. გამგეობის ტექნიკით და ინფრასტრუქტურის სამსახურის თანამშრომლების დახმარებით კი სისტემა დაქსელეს. საერთო ჯამში აღნიშნული სამუშაოებისთვის 3 000 ლარამდე დაიხარჯა.

ადგილობრივები ფიქრობენ, რომ მას შემდეგ, რაც სოფელში არსებული სასმელი წყალი გადანაწილდება, წყლის დებეტის შემცირების გამო მეზობლებს შორის უკმაყოფილება გაჩნდება, სავარაუდოდ ეს არის მიზეზი, რის გამოც 12–მა ოჯახმა მილები თავისი ნებით არ დააერთა.

აღნიშნული გადაწყვეტილებით გაკვირვებულია ალექსანდრე პაპაშვილი. იგი ამბობს, რომ პრობლემის ასეთი ხერხით მოგვარებაზე რუსთავის მოსახლეობა თავად დათანხმდა.

შეგახსენებთ, რომ სოფელ რუსთავის მოსახლეობას მესამე თვეა სასმელი წყალი არ აქვს. ადგილობრივები ამბობენ, რომ სისტემა, რომლითაც სოფელი მარაგდებოდა „მტკვარი ჰესის“ მშენებლობისას დაზიანდა. აღნიშნულთან დაკავშირებით მოსახლეობამ ასპინძის გამგეობის წინ აქციაც გამართა.

[თინათინ ზაზაძე, ასპინძა]