სამი დღეა ზარზმელის ქუჩას სასმელი წყალი არ აქვს

ადგილობრივები ამბობენ, რომ ცენტრალური მილი რამდენიმე ადგილასაა გამსკდარი, რის გამოც მთელ დასახლებას სამი დღეა წყალი არ მიეწოდება. მათი თქმით, წყლის მიწოდება ამ დასახლებაში მიმდინარე სარეაბილიტაციო სამუშაოებმა გამოიწვია, რომელსაც კომპანია ”შინაშხარი” ასრულებს.

”სარემონტო სამუშაოები ტარდება, გამოუშვეს წყალი და მერე ერთ ადგილას გასკდა მილი. გააკეთეს, მაგრამ სასინჯად რომ გამოუშვეს, სხვა ადგილას გასკდა”, - გვიხსნის ზარზმელის ქუჩაზე მცხოვრები მედიკო ზედგინიძე.

ამ ეტაპზე ზარზმელის ქუჩაზე სარეაბილიტაციო სამუშაოები არ მიმდინარეობს. ადგილობრივები ამბობენ, რომ მუშები სამი დღეა მუშაობენ.

ზარზმელის ქუჩაზე მცხოვრები მოსახლეობის ნაწილი წყალს დასახლებასთან ახლოს მდებარე ჭიდან ეზიდება. ნაწილს კი ჯერ ისევ აქვს გასულ დღეებში ავსებული წყლის მარაგი.

”ამაზე მეტი გაჭირვებაც გვქონია, თვეობით არ გვქონდა ხოლმე წყალი. ოღონდ წყლის პრობლემა მოგვარდეს, სამი დღე როგორმე გავძლებთ”, - ამბობს ამავე ქუჩაზე მცხოვრები ნინა კუპრაძე.

აღნიშნულ დასახლებას წყალი განრიგით მიეწოდება. ადგილობრივებს იმედი აქვთ, რომ პრობლემა მოგვარებულია და გვიან საღამოს ონკანში წყალი აუცილებლად გამოვა.



[თამარ თოთაძე, ახალციხე]