მარგველაშვილთან შესახვედრად სოფლებიდან მიკროავტობუსებით ჩამოვიდნენ

აწყური, ვალე, ბოგა, წყრუთი ეს იმ სოფლების მცირე ჩამონათვალია, საიდანაც მოსახლეობა სპეციალურად აქციისთვის გამოყოფილ მიკრო ავტობუსებით ჩამოვიდა.

მარგველაშვილის ვიზიტს სოფელ აწყურიდან 200-მდე ადამიანი შეუერთდა. როგორც აწყურის მკვიდრი პენსიონერი გულო ბოჟაძე ამბობს მოსახლეობამ საკუთარი სურვილით გადაწყვიტა, რომ გიორგი მარგველაშვილს დახვედროდა, თუმცა ახალციხეში საკუთარი ხარჯით არ ჩამოსულა.

„აქ იმიტომ ვართ, რომ მხარს ვუჭერთ ოცნების პრეზიდენტობის კანდიდატს. უკეთესი ცხოვრების იმედი გვაქვს. წინა დღეს გვითხრეს, რომ სოფელში მარშუტკები იქნებოდა გაჩერებული, რომელიც აქციაზე წამოგვიყვანდა, ფული არაფერში გადაგვიხდია“,-ამბობს გულო ბოჟაძე, სოფელი აწყურის მკვიდრი.

საკუთარი სურვილით და ხარჯით ჩამოვიდნენ ვალის მცხოვრებლები.

„ვისაც უნდოდა დღევანდელ დღეს აქ ყოფილიყო ისინი წამოვედით, საკუთარი ტრანსპორტით. ჩვენ მხარს ვუჭერთ გიორგი მარგველაშვილს“,-ამბობს ვალის მკვიდრი კახა სარიშვილი.

გიორგი მარგველაშვილის დასახვედრად სოფლებიდან სკოლის მოსწავლეები და მასწავლებლებიც ჩამოვიდნენ.

„მარშუტკებით ვართ ჩამოსულები. მასწავლებლებმა გვითხრეს, რომ გიორგი მარგველაშვილის დასახვედრად ახალციხეში უნდა წავიდეთო. სოფელშიც იყვნენ "ოცნების" წევრები ამოსულები და გვითხრეს რომ ჩამოვსულიყავით“,-ამბობს სოფელ წინუბნის მკვიდრი სკოლის მოსწავლე მარი კურტანიძე.

სოფელ ბოგაში მცხოვრებ ოთარ გორგაძეს იმედი აქვს, რომ პრეზიდენტი გიორგი მარგველაშვილი გახდება: „ძალიან კარგი კაცია, პატიოსანი. გვინდა, რომ ეს ადამიანი გახდეს ჩვენი პრეზიდენტი“.

მარგველაშვილის ვიზიტს საჯარო სამსახურის თანამშრომლებიც ესწრებოდნენ. აქციაზე იმყოფებოდნენ ახალციხის მუნიციპალიტეტის გამგებელი ბესიკ ბლიაძე და გამგეობის თანამშრომლები, ასევე ახალციხის მუნიციპალიტეტის საკრებულოს თავმჯდომარე ოლეგ სანდროშვილი. მარგველაშვილის შეხვედრა მოსახლეობასთან 13:00 საათზე იყო დაგეგმილი, თუმცა ადგილობრივი თვიმმართველობის წარმომადგენლები შეხვედრაზე დროზე ადრე 12:30 საათზე გამოჩნდნენ.



ასევე აქციაზე იმყოფებოდნენ საბავშო ბაღების თანამშრომლები, საჯარო სკოლის მასწავლებლები და სამცხე-ჯავახეთის სახელმწიფო სასწავლო უნივერსიტეტის რექტორი მერაბ ბერიძე, ასევე უნივერსიტეტის ადმინისტრაციის სხვა თანამშრომლებიც.



[sknews.ge]