მარგველაშვილი მერაბიშვილის მშობლიურ კუთხეს სტუმრობდა (R)

მარგველაშვილთან ერთად ადიგენს „რესპუბლიკური პარტიის“ ერთ-ერთი ლიდერი დავით ბერძენიშვილიც ესტუმრა.

„პრეზიდენტი გიორგი მარგველაშვილი, პარლამენტის თავჯდომარე და პრემიერი - ის ტრიადაა, რომელიც ქვეყანას მყარი დემოკრატიის საფუძველს შეუქმნის“, - განაცხადა დავით ბერძენიშვილმა.

წინასაარჩევნო კამპანიის ფარგლებში, გიორგი მარგველაშვილმა ადგილობრივებს საარჩევნო გეგმა გააცნო და დაჰპირდა, რომ ადიგენის მუნიციპალიტეტში ყველა პრობლემა ეტაპობრივად მოგვარდება.

მარგველაშვილთან შესახვედრად მოსახლეობა ადიგენის სხვადასხვა სოფლიდან შეიკრიბა. შეხვედრას ესწრებოდნენ უფროსკლასელი მოსწავლეებიც.

ადგილობრივებმა მარგვლაშვილს ინფრასტრუქტურული და სოციალური პრობლემების მოგვარება სთხოვეს.

„საქართველოში არსებულ ყველა პრობლემას შეეხო და დაგვპირდა, რომ ყველაფერს ნელ-ნელა მოაგვარებს“, - გვითხრა ადიგენის მუნიციპალიტეტის სოფელი მოხის მკვიდრმა ნელი მეტრეველმა.

როგორც მოხიდან, ასევე ადიგენის მუნიციპალიტეტის სხვა სოფლებიდან, მოსახლეობა პრეზიდენტობის კანდიდატის დასახვედრად სამაშრუტო ტაქსებით ჩამოვიდა. ისინი აცხადებდნენ, რომ ჩამოსვლა მათი სურვილი იყო.

შეხვედრას ყოფილი პრემიერ-მინისტრის, ვანო მერაბიშვილის მშობლიური სოფლის, უდეს მცხოვრებლებიც ესწრებოდნენ. შეხვედრაზე იყვნენ სოფელ აბასთუმნიდანაც.

„რა თქმა უნდა ჩვენი სურვილით ჩამოვედით. რამდენიმე დღით ადრე გვითხრეს, რომ მარგველაშვილი უნდა ჩამოვიდესო, ჩვენც დიდი სიამოვნებით დავხვდით“,- ამბობს სოფელ აბასთუმნის მკვიდრი.

„ქართული ოცნება“ დემოკრატიული საქართველოს ადიგენის რაიონული ორგანიზაციის თავმჯდომარე ლევან ლობჟანიძე გიორგი მარგველაშვილის ვიზიტით კმაყოფილია. იგი ამბობს, რომ პრეზიდენტობის კანდიდატის დასახვედრად ადიგენის მუნიციპალიტეტის გამგეობის შენობის წინ 3 ათასამდე კაცი შეიკრიბა: „ძალიან კარგი შეხვედრა იყო, ბევრი ხალხიც მოვიდა. არავინ ელოდა ამდენ ხალხს“.

ადიგენის მოსახლეობასთან შეხვედრის შემდეგ გიორგი მარგველაშვილი ვანო მერაბიშვილის მშობლიურ სოფელს, უდეს ესტუმრა და უდის ღვთისმშობლის მიძინების სახელობის ტაძარში ახალციხისა და ტაო-კლარჯეთის მიტროპოლიტ თეოდორესთან ერთად იტრაპეზა.

ადიგენში სტუმრობით გიორგი მარგველაშვილმა სამცხე-ჯავახეთის შემოვლა დაასრულა. ადიგენამდე იგი დღეს ახალქალაქსა და ნინოწმინდას სტუმრობდა.

[მანანა სარაშვილი, ადიგენი]