რატომ ესწრებოდნენ მარგველაშვილის შეხვედრას თისელის სკოლის პედაგოგები

ახალციხის მუნიციპალიტეტის სოფელ თისელის საჯარო სკოლის პედაგოგი, „ნინო ბურჯანაძე - დემოკრატიული საქართველოს“ მხარდამჭერი მაია უსტიმენკო აცხადებს, რომ 12 სექტემბერს ახალციხეში მარგველაშვილთან შეხვედრაზე პედაგოგები და მოსწავლეები ისევ ისე წამოიყვანეს როგორც ეს „ნაციონალების“ დროს ხდებოდა.

უსტიმენკო კოალიცია „ქართული ოცნების“ მხარდამჭერი იყო, თუმცა, მას შემდეგ რაც ახალციხეში „ქართული ოცნების“ შტაბი გაიხსნა მან გადაწყვიტა მხარი „ბურჯანაძე დემოკრატებისთვის“ დაეჭირა, რადგან შატაბს სათავეში ისეთი ადამიანები ჩაუდგნენ, რომლებიც გასული წლის საპარლამენტო არჩევნებამდე მათ გვერდით არ იდგნენ და მათთან ერთად არ იბრძოდნენ. თუმცა, როგორც თავად ამბობს, საბოლოო გადაწყვეტილება „ოცნების“ მხარდაჭერაზე უარი ეთქვა, 12 სექტემბერს ახალციხეში „ქართული ოცნების“ პრეზიდენტობის კანდიდატის გიორგი მარგველაშვილის ვიზიტის შემდეგ მიიღო.

„როცა სააკაშვილი, მერაბიშვილი, ან ახალციხეში ბიბლიოთეკის მეოთხედ გასახსნელად წერეთელი ჩამოდიოდა, გვეზიდებოდნენ ამ საცოდავ პედაგოგებს. ფიქრობდნენ, რადგან პედაგოგი ხარ, ტაში უნდა დაგეკრა მათთვის, - ამბობს უსტიმენკო და ამატებს, რომ ანალოგიური გააკეთეს ახლაც: მთელი ჩემი კოლექტივი იყო, მარგველაშვილი რომ ჩამოვიდა. დირექტორმა გვითხრა, რომ წამოვსულიყავით, მაგრამ მას ვერ დავადანაშაულებ , მასაც ზემოდან დაავალეს. ის ასე ეზიდებოდა მთელი 7 წელი ხალხს. ვერ გეტყვით ჩვენ დირექტორს ვინ დაავალა, მაგრამ გაგვაფრთხილა, რომ უნდა წამოვსულიყავით. მას გარკვეული რაოდნობა უნდა წამოეყვანა მასწავლებლებისაც და მოსწავლეებისაც“.

უსტიმენკო ამბობს, რომ მათ სკოლაში 16 ბავშვი სწავლობს: „პირველკლასელებს ხომ არ წამოვიყვანდით?! ამიტომ წამოვიყვანეთ 5 მაღალკლასელი. ყველა პედაგოგი ვიყავით გარდა ერთისა, ის შეუძლოდ გახლდათ და იმიტომ ვერ წამოვდა“.

თისელის სკოლის დირექტორი დიანა კახელი კატეგორიულად უარყოფს იმას, რომ მას სკოლიდან პედაგოგებისა და მოსწავლეების წაყვანის შესახებ ვინმემ დავალება მისცა: „უბრალოდ ვიცოდი, რომ მარგველაშვილი მოდიოდა და შევთავაზე პედაგოგებს ხომ არ წამოვიდოდნენ. არ ვიცი რამდენი ბავში იყო, იყვნენ ის ბავშვები, ვისი მშობლებიც წამოვიდნენ. რაც შეეხება პედაგოგებს, სკოლაში 9 მასწავლებელია და 9-ვე აქციაზე ნამდვილად არ ვყოფილვართ“.

კოალიცია „ქართული ოცნების“ ახალციხის შტაბის უფროსი მალხაზ ჟუჟნაძე აცხადებს, რომ არავისთვის აქციაზე მოსვლის შესახებ დავალება არ მიუციათ: „ჩვენ არც პოლიციური და არც უშიშროების რესურსი არ გამოგვიყენებია, ისე როგორც ეს ხდებოდა „ნაციონალების“ დროს. ასე რომ მოვქცეულიყავით, მარგველაშვილთან შეხვედრაზე 4-ჯერ და 5-ჯერ მეტი ადამიანი მოვიდოდა, მაგრამ ყველა ზონის კოორდინატორი გაფრთხილბეული გვყავდა, რომ ძალა არავისთვსის დაეტანებინათ და წამოსულიყო ის, ვისაც ამის სურვილი ჰქონდა“.

მე-4 ზონის კოორდინატორი დავით მოდებაძე, რომელსაც თისელსა და მის მიმდებარე სოფლებში ხალხის მობილიზება ჰქონდა დავალებული ამბობს, რომ მარგველაშვილთან შეხვედრაზე წასვლის შესახებ დავალება არავისთვის მიუციათ: „ხალხი თავისი ნებით წამოვიდა. უფრო მეტიც ყველა მსურველის წამოყვანა ვერ შევძელით. თისელიდან სულ 20 კაცი იყო წამოსული“.

[თამუნა უჩიძე, ახალციხე]