მარგველაშვილმა მესხეთში მოსახლეობასთან შეხვედრა დაასრულა

მარგველაშვილს ასპინძაში არა მხოლოდ დაბაში მცხოვრებლები, არამედ ასპინძის მუნიციპალიტეტის სხვადასხვა სოფლებიდან ჩამოსულებიც დახვდნენ.

ადგილობრივები ამბობენ, რომ მათ მუნიციპალიტეტში მთავარი პრობლემა სასმელი წყალი და მიწების დაკანონებაა.

სოფელ ოშორისა და ხიზაბავრის მკვიდრები, ამბობენ, რომ მათი სოფლებიდან მოსახლეობის ნაწილი სოფელში გამოგზავნილი სამარშრუტო ტაქსებით, ნაწილი კი საკუთარი მანქანებით ჩამოვიდა.

„თითო სოფლიდან 20-30 კაცი ვართ წამოსული. ადრე ასე თავისუფლება არ იყო. ახლა ვისაც გვინდოდა ის წამოვედით, ვისაც არა და სახლში დარჩა“, - ამბობს ოშორელი ლექსო მიქელაძე და ამატებს, რომ მარგველაშვილის პრეზიდენტობის შემთხვევაში ქვეყანაში ეკონომიკა წინ მნიშვნელოვნად წაიწევს.

მარგველაშვილი ამომრჩეველს ასპინძის ცენტრში, მოედანზე შეხვდა. ამ წუთებში იგი ასპინძიდან ახალციხისკენ მოემართება. როგორც „სამხრეთის კარიბჭესთან“ მარგველაშვილის პრესსამსახურის წარმომადგენელმა განაცხადა, პრეზიდენტობის კანდიდატი რეზიდენციაში მეუფე თეოდორემ მიიწვია.

[sknews. ge]