სასამართლო კორხის ეკლესიის საქმეზე ისევ გადაიდო

„მოგეხსენებათ, რომ საქმეს თავიდანვე აწარმოებდა ძეგლთა დაცვის სააგენტოს ინსპექციის უნებართვო სამუშაოებზე რეაგირების განყოფილების უფროსი, ლევან ჭავჭავაძე. მან დღეს სასამართლოზე დასწრება, გადაუდებელი საქმის გამო, ვერ შეძლო. სწორედ ამიტომ დავაყენე შუამდგომლობა სასამართლო პროცესი 28 ივნისს გადაგვედო. მოსამართლემ შუამდგომლობა დააკმაყოფილა“, – განაცხადა კულტურული მემკვიდრეობის სააგენტოს იურისტმა ალექსანდრე ჩიხრაძემ.

სოფელ კორხის წმინდა სტეფანეს სახელობის ტაძრის უნებართვო მშენებლობის ინიციატორი, იური წარუკიანი ძეგლთა დაცვის სააგენტომ „საქართველოს ადმინისტრაციულ სამართალდარღვევათა კოდექსის“ 88-ე მუხლის პირველი პუნქტის თანახმად, 21 მაისს, 5000 ლარის ოდენობის ადმინისტრაციული სახდელით დააჯარიმა, რომლის კანონიერებას ახალქალაქის მუნიციპალიტეტის პირველადი ინსტანციის სასამართლო დაადგენს.

წმ.სტეფანეს სახელობის ეკლესიაზე უნებართვო სამუშაოები მაისში დაიწყო. კულტურული მემკვიდრეობის ძეგლი პირვანდელი სახით აღარ არსებობს.

[გულო კოხოძე, ახალქალაქი]