‘იქ მიდის აბსოლუტური განუკითხაობა’ – ძეგლთა დაცვა კორხის ეკლესიის რეაბილიტაციაზე

კულტურული მემკვიდრეობის დაცვის ეროვნულ სააგენტოში აცხადებენ, რომ იმ შემთხვევაში, თუ ადგილობრივები სააგენტოს მოთხოვნას არ გაითვალისწინებენ, მაშინ სამართალდამცავებს მიმართავენ.

„თუ უნებართვო სამშენებლო სამუშაოები ისევ გრძელდება, შესაძლებელია მეორე ჯარიმაც დავაკისროთ. თუ ამანაც არ იმოქმედა უკვე წავა სისხლის სამართლებრივი პროცესი, ჩავრთავთ შესაბამის უწყებას, რადგან ეს პროცესი არის შესაჩერებელი, იქ მიდის აბსოლუტური განუკითხაობა“, – ამბობს სააგენტოს საზოგადოებასთან ურთიერთობის სამსახურის წარმომადგენელი ბექა ბარამიძე.

სოფელ კორხში, წმ.სტეფანეს სახელობის ეკლესიაში უნებართვო სამუშაოები 12 მაისს დაიწყო. კულტურული მემკვიდრეობის ძეგლი პირვანდელი სახით აღარ არსებობს.

კორხის ტაძარი სომეხთა სამოციქულო ეკლესიის დაქვემდებარებაშია.

უნებართვოდ დაწყებულ სარეაბილიტაციო სამუშაოებზე, სომეხთა სამოციქულო ეკლესიის საქართველოს ეპარქიის ეპისკოპოსს ვაზგენ მირზახანიანს საუბარი არ სურს.

„ამ საკითხზე დაურეკეთ სამცხე–ჯავახეთის ეპარქიის ხელმძღვანელს“, – გვითხრა ვაზგენ ამირხანიანმა.

„სამხრეთის კარიბჭეს“ სატელეფონო ზარებს კი სომეხთა ეპარქიის სამცხე–ჯავახეთის და წალკის არქიმანდრიტმა მაღაქია ამირანიანმა არ უპასუხა.

უნებართვოდ დაწყებული სარეაბილიტაციო სამუშაოების კულტურული მემკვიდრეობის დაცვის სააგენტომ, ადგილობრივი იური წარუკიანი ჯერ გააფრთხილა, შემდეგ კი 5000 ლარით დააჯარიმა. მიუხედავად ამისა, კორხში სააგენტოს მოთხოვნა არ გაითვალისწინეს და სამუშაოები გააგრძელეს.

ადგილობრივები ამბობენ, რომ ეკლესის რეაბილიტაციის ნებართვას სამი წელია ითხოვენ, აღნიშნული ტაძარი ეკონომიკის სამინისტროს ბალანსზეა.

"სოფელი სამი წელი ელოდა ეკონომიკის სამინისტროსგან პასუხს რეაბილიტაციის ნებართვაზე. რადგან პასუხი არ მოვიდა შევიკრიბეთ სოფელი და გადავწყვიტეთ, ჩვენ თვითონ დაგვეწყო რემონტი. ეკლესიიდან ქვები ცვიოდა და საშიში იყო. სხვებთან ერთად მეც დავაფინანსე მშენებლობა", – ამბობს "სამხრეთის კარიბჭესთან" სატელეფონო საუბარში იური წარუკიანი.

მისი თქმით, დღეს, 29 მაისს ეკლესიაზე სამუშაოები არ განახლებულა: "ამჟამად ტერიტორიას ასუფთავებენ".

შევიდა თუ არა წერილი ეკონომიკის სამინისტროში და რატომ ვერ მიიღეს ადგილობრივებმა პასუხი უწყებისგან, უცნობია. სამინისტროს საზოგადოებასთან ურთიერთობის სამსახურში განგვიმარტეს, რომ ამ თემაზე კომენტარს არ გააკეთებენ.

[გულო კოხოძე, ახალქალაქი]