კორხის ეკლესიის საქმეზე სასამართლო პროცესი გადაიდო

ძეგლთა დაცვის სააგენტოს ინსპექციის უნებართვო სამუშაოებზე რეაგირების განყოფილების უფროსის ლევან ჭავჭავაძის თქმით, ახალქალაქის მუნიციპალიტეტის რაიონულ სასამართლოში ჩანიშნული სასამართლო პროცესი 20 ივნისთვის გადაიდო.

„გადადება მოსამართლემ მოითხოვა – სასწრაფო აღმკვეთი ღონისძიების შეფარდების პროცესი მაქვსო. თუმცა, სხდომის რაღაც ნაწილი ჩატარდა, მტკიცებულებები წარვადგინე, მეორე მხარემ კი მოწმის დაკითხვა მოითხოვა, რომელიც, სავარაუდოდ, 20 ივნისს დაიკითხება“, – გვითხრა ლევან ჭავჭავაძემ.

სოფელ კორხის წმინდა სტეფანეს სახელობის ტაძრის უნებართვო მშენებლობის ინიციატორი, იური წარუკიანი ძეგლთა დაცვის სააგენტომ „საქართველოს ადმინისტრაციულ სამართალდარღვევათა კოდექსის“ 88-ე მუხლის პირველი პუნქტის თანახმად, 21 მაისს, 5000 ლარის ოდენობის ადმინისტრაციული სახდელით დააჯარიმა, რომლის კანონიერებას ახალქალაქის მუნიციპალიტეტის პირველადი ინსტანციის სასამართლო დაადგენს.

წმ.სტეფანეს სახელობის ეკლესიაზე უნებართვო სამუშაოები მაისში დაიწყო. კულტურული მემკვიდრეობის ძეგლი პირვანდელი სახით აღარ არსებობს. ძეგლთა დაცვის სააგენტომ კორხის ეკლესის საქმეზე, საინიციატივო ჯგუფს, სამუშაოების გასაგრძელებლად, პროექტის სააგენტოსთან შეთანხმება და არქეოლოგიური კვლევის ჩატარება დაავალა.

[გულო კოხოძე, ახალქალაქი]