დამნაშავე არ იკვეთება, თუმცა ფაქტზე სისხლის სამართლის საქმე აღიძრა – კორხის ეკლესიის ამბავი

ძეგლთა დაცვის სააგენტოს ინსპექციის, უნებართვო სამუშაოებზე რეაგირების განყოფილების უფროსის, ლევან ჭავჭავაძის თქმით, „უნებართვო სამუშაოები სახეზე იყო, გაფრთხილება ჰქონდა პიროვნებას გაგზავნილი, თუმცა მოსამართლემ ეს ყველაფერი არ გაითვალისწინა და დაადგინა, რომ პიროვნება არ არის სამართალდამრღვევი“.

ლევან ჭავჭავაძის განცხადებით, მათ უკვე მიმართეს შინაგან საქმეთა სამინისტროს ეკლესიის უნებართვო მშენებლობასთან დაკავშირებით.

„ეს უკვე სისხლის სამართლის საქმეა. მე დღეს დამკითხეს ახალქალაქის პოლიციაში და რა მუხლით აღიძვრება საქმე და როგორი იქნება შემდგომი პროცედურები, აწი გახდება ჩვენთვის ცნობილი“, – დასძინა მან.

მიმდინარე წლის 21 მაისს, ძეგლთა დაცვის სააგენტომ, სოფელ კორხის წმინდა სტეფანეს სახელობის ტაძრის უნებართვო მშენებლობის ინიციატორობისთვის იური წარუკიანს, „საქართველოს ადმინისტრაციულ სამართალდარღვევათა კოდექსის“ 88-ე მუხლის პირველი პუნქტის თანახმად, 5000 ლარის ოდენობის ადმინისტრაციული სახდელი დააკისრა. დღეს, 24 ივლისს კი ახალქალაქის რაიონული სასამართლოს მოსამართლემ წარუკიანი სამართალდამრღვევად არ ცნო.

წმ.სტეფანეს სახელობის ეკლესიაზე უნებართვო სამუშაოები მაისში დაიწყო.

ამ დროსითვის ეკლესიის ნახევარი განადგურებულია.

[გულო კოხოძე, ახალქალაქი]