აბასთუმანში მცხოვრებ ყვირილიანებს ჩამოშლილი კლდე სახლს უნგრევს

73 წლის თინათინ ყვირილიანი დაბა აბასთუმანში, რუსთაველის #68-ში, შვილთან ერთად ცხოვრობს. სახლი კლდესთან დგას და ეზოში ყოველდღე ჩამოშლილი კლდის ლოდები ცვივა.

„ერთი მეტრის სიმაღლეზეა მოწოლილი კლდის ნაშალი. ერთ დღეს შეიძლება კედელი დამინგრიოს ლოდებმა. სახლში ისეთი სინესტეა, იატაკი დალპა და სოკოები ამოვიდა, ზამთარში კედელი ყინულებით იფარება. ვითხოვ დაგვეხმაროს ვინმე, სანამ სავალალო შედეგებს არ გამოიწვევს“, - ამბობს ოჯახის დიასახლისი.

ყვირილიანმა ადიგენის მუნიციპალიტეტის გამგეობას პირველად სამი წლის წინ მიმართა, თუმცა უშედეგოდ. სამი წლის განმავლობაში ადგილობრივ ხელისუფლებაში გამუდმებული სიარულის შედეგად, მიიღო წერილობითი პასუხი, რომელშიც ნათქვამი იყო, რომ მის დასახმარებლად ბიუჯეტში თანხა არ აქვთ.

„იმდენი ვიარე პასუხის ღირსი მაინც გამხადეთ-თქო, რომ სამი წლის შემდეგ მომწერეს, ახლა თანხა არ გვაქვს და როცა საშუალება გვექნება დაგეხმარებითო. ვიღაცამ მოგვხედოს ხომ შეიძლება?! თუ ფიქრობენ, რომ მოხუცია, მალე მოკვდება და დახმარება აღარ დასჭირდებაო“, - ამბობს თინა ყვირილიანი.

ყვირილიანების გარდა, მსგავსი პრობლემის წინაშე ამავე ქუჩაზე კიდევ სამი ოჯახი იყო, თუმცა, მათ კლდის შესაჩერებლად ბეტონის კედელი ჩაასხეს. ყვირილიანებს კი ამის საშუალება არ აქვთ.

კითხვაზე - რატომ ვერ შეძლეს აქამდე აღნიშნული ოჯახის დახმარება , ადიგენის მუნიციპალიტეტის გამგებლის მოვალეობის დროებით შემსრულებელს არსენ ბალახაშვილს პასუხის გაცემა უჭირს. (შეგახსენებთ, იგი მოვალეობის შემსრულებლად 2 სექტემბერს დაინიშა, 2008 წლიდან ამ დრომდე კი გამგებლის პირველი მოადგილე იყო).

„ინფრასტრუქტურის სამსახურის წარმომადგენლებს ხვალვე გავუშვებ, ჩამაყენებენ საქმის კურსში, ამის შემდეგ გადავხედავ ბიუჯეტს და გადავწყვეტთ რა დახმარების გაწევა შეგვიძლია“, - გვარწმუნებს იგი.



[თინათინ ზაზაძე, აბასთუმანი]