საცხოვრებლად ქცეული სოფლის კლუბი

ახალციხის მუნიციპალიტეტის სოფელ ფერსაში მცხოვრებ ჩოქურების ოჯახი უბინაოდ გასული წლის შემოდგომაზე დარჩა. იმის გამო, რომ შენობა ავარიული იყო მთლიანად დაინგრა. ახლა მათ არც საცხოვრებელი სახლი და არც საყოფაცხოვრებო ნივთები ავთ. ოჯახი სოციალურად დაუცველთა კატეგორიას მიეკუთვნება. ოჯახის მხოლოდ ერთი წევრი მუშაობს და იმდენი შემოსავალი არ აქვთ, რომ ახალი სახლი ააშენონ.

- "სახლის კდლები რომ ჩამოინგრა, ნანგრევებში მოყოლას გადავურჩით. ახლა კლუბის შენობაში, ორ პატარა ოთახში ვცხოვრობთ. დედაჩემმა პურის საცხობში დაიწყო მუშაობა, არც მე და არც ჩემი ძმა არსად არ ვმუშაობთ და სხვა შემოსავალი არ გვაქვს”, - ამბობს თამარ ჩოქური.

ოჯახმა დახმარება ადგილობრივ ხელისუფლებას სთხოვა.

- "იქნებ ვინმემ მოგვაქციოს ყურადღება და რამით მაინც დაგვეხმარონ. ახალციხის მუნიციპალიტეტის გამგეობას მივმართეთ, მაგრამ ჯერ არავინ მოსულა”.

ახალციხის მუნიციპალიტეტის სოფელ ფერსის ტერიტოიული ორგანოს რწმუნებული გელა ლომიძე ამბობს, რომ ოჯახს გვერდში უგას და შეძლებისდაგვარად ეხმარება.

- "მოხსენებითი ბარათი დავწერე და გამგეობაში გავაგზავნე. ამ პრობლემის შესახებ წინა გამგებელმა, ბესო ხითარიშვილმა იცოდა, რადგან განცხადება მისი მუშაობის პერიოდში დავწერე, ახლა კი თათბირზეც ვთქვი ამ ოჯახის შესახებ, თუმცა ამ დრომდე არანაირი დახმარება არ მიუღიათ, - ამბობს გელა ლომიძე და ამატებს, რომ მოხსენებით ბარათში აღნიშნა, რომ ჩოქურების სახლი შეკეთებას არ ექვემდებარება და ახალი უნდა აშენდეს: თუ გამგეობა სამშენებლო მასალის გამოყოფას შეძლებს, მაშინ სახლის აშენებაში ადგილობროვებიც დაეხმარებიან”.

ყოფილი კლუბის შენობაც მოძველებულია. აქ ახლა არც დენი და არც წყალი აქვთ. ოჯახი ყოველგვარი საყოფაცხოვრებო პირობების გარეშე ცხოვრობს.

- "გლობალტივის ანტენა დაამონტაჟეს. მადლობა, მაგრამ დენი არ გვაქვს და ანტენა რად გვინდა. იმ სახლში დენი მაინც გვქონდა, ახლა რამე რომ გვჭირდება ისევ დანგრეულ სახლში მივდივართ, წყალსაც სოფლის წყაროდან ვზიდავთ”, - ამბობს ტამარ ჩოქური.

ახალციხის მუნიციპალიტეტის გამგებლის მოვალეობის შემსრულებლის ბესიკ ბლიაძის განმარტებით, ყველა ოჯახისთვის ახალი სახლის აშენება მუნიციპალიტეტის გამგეობას არ შეუძლია.

- "ეს კერძო საკუთრებაა და მათ თავად უნდა მიხედონ. მესმის, რომ ახალი სახლის ასაშენებლად საშუალება არ აქვთ, ვისაც ავარიული სახლი დაენგრევა ყველას ვერ დავეხმარებით. ამ საქმეს შესაბამისი კომისია განიხილავს და გადაწყდება რით შეგვიძლია დახმარება. საშენ მასალას გამოვუყოფთ ამის შემდეგ”, - ამბობს ბესიკ ბლიაძე და ამატებს, რომ ასეთი ოჯახები ახალციხეშიც ბევრია, ამიტომ ყველას დახმარება ძნელია.

მისივე თქმით, ახალციხის მუნიციპალიტეტის გამგეობა დაზარალებულ მოსახლეობას იმ შემთხვევაში აკმაყოფილებს, თუ მათ სახლი სტიქიური მოვლენების შედეგად დაენგრათ. სხვა შემთხვევაში დახმარება არ შეუძლიათ.



[ნუკა სტეფნაძე, ახალციხე]