კურორტ აბასთუმანში დამწვარ სახლს ნაწილობრივ შეაკეთებენ

ამ ეტაპზე ადიგენის მუნიციპალიტეტის გამგეობის ინფრასტრუქტურის სამსახურის თანამშრომლები ზარალის ოდენობას აღწერენ. მოგვიანებით კი სახურავის სარეაბილიტაციო სამუშაოები დაიწყება.

„სპეციალისტები აბასთუმანში იმყოფებიან და აზომვებს აკეთებენ. შესაბამისი ხარჯთაღრიცხვის შედგენის შემდეგ გავაკეთებთ სახურავს“, – ამბობს ადიგენის მუნიციპალიტეტის გამგეობის ინფრასტრუქტურის სამსახურის უფროსი გოდერძი სხირტლაძე.

ადგილობრივ თვითმმართველობაში განმარტავენ, რომ გადაწყვეტილება 21 ოქტომბერს, კულტურული მემკვიდრეობის სააგენტოდან ჩამოსულ მონიტორინგის ჯგუფთან ერთად მიიღეს. თუმცა რეაბილიტაცია მხოლოდ სახურავს ჩაუტარდება.

“ფასადს ვერ შევეხებით, რადგან კულტურული მემკვიდრეობის ძეგლია, მთავარია რომ ხალხს თავზე არ დააწვიმოს და საცხოვრებელი ჰქონდეს, ჩვენ ახლა ამას ვცდილობთ“, –განმარტავს გოდერძი სხირტლაძე.

შეგახსენებთ, რომ კურორტ აბასთუმანში, ფალიშვილის ქუჩაზე მდებარე სახლს ცეცხლი 18 ოქტომბერს გაუჩნდა. ხანძრის შედეგად დაიწვა სახურავი და დაზიანდა კედლები, რის გამოც სამი ოჯახი ღია ცისქვეშ დარჩა. მათ თავი დროებით მეზობლებთან შეაფარეს.

[თინათინ ზაზაძე, ადიგენი]