კურორტ აბასთუმანში ხანძრის შედეგად დაზარალებული ოჯახების ბედი გაურკვეველია

ადიგენის მუნიციპალიტეტის გამგეობაში აცხადებენ, რომ რადგან დამწვარი შენობა კულტურული მემკვიდრეობის ძეგლთა ნუსხაშია, კულტურული მემკვიდრეობის დაცვის ეროვნული სააგენტოს ნებართვის გარეშე სარეაბილიტაციო სამუშაოებს ვერ დაიწყებენ.

„ვაწარმოებთ მოლაპარაკებებს, აუცილებლად დავეხმარებით“, – აცხადებს საზოგადოებასთან ურთიერთობის სამსახურის წარმომადგენელი მამუკა კალანდაძე.

„სამხრეთის კარიბჭეს“ კითხვაზე სად იცხოვრებენ დაზარალებული ოჯახები, მანამდე ვიდრე შენობის რეაბილიტაციის ნებართვას მიიღებენ, ასე გვპასუხობს: „ერთ ოჯახს მეორე სახლიც აქვს და იქ გადავა, დანარჩენები ალბათ ნათესავებთან წავლენ“.

შეგახსენებთ, რომ ფალიაშვილის ქუჩაზე, ე.წ. როშის დასახლებაში მდებარე ერთ–ერთ საცხოვრებელ სახლს ცეცხლი გუშინ, 18 ოქტომბერს გაუჩნდა.

ხისგან აშენებულ სახლში ამჟამად სამი ოჯახი ცხოვრობდა, თუმცა გამგებლის წარმომადგენლის დროებით მოვალეობის შემსრულებლის გიორგი გედევანიძის განმარტებით, შენობა კიდევ რამდენიმე პირს ეკუთნის, რომლებიც აბასთუმანში ძირითადად ზაფხულში ჩამოდიან.

[თინათინ ზაზაძე, ადიგენი]