თექის ნამუშევრების გამოფენა

50-მდე ნამუშევარზე, რომლებშიც წმინდანები, მეფეები, სამცხე-ჯავახეთში არსებული ტაძრები, სხვადასხვა მულთფილმების გმირები, თოჯინები და სხვადასხვა სამკაულები ჭარბობს, ათი სოციალურად დაუცველი ქალბატონი შვიდი თვის განმავლობაში მუშაობდა.

ათმა მოხალისემ თექაზე მუშაობა სათემო კავშირ ”ღრელის” დახმარებით დაიწყო.

ფონდ ”ღია საზოგადოება საქართველოს” ფინანსური მხარდაჭერით, გასული წლის შემოდგომიდან, კავშირმა ”ღრელი” დაიწყო პროექტის განხორციელება, სახელწოდებით - ”სოციალური საწარმო სათემო კავშირის მხარდამხარ”.

პროექტის ფარგლებში, სოფელ ღრელში მცხოვრებ ათ სოციალურად დაუცველ ქალბატონს თავდაპირველად თექაზე მუშაობა შეასწავლეს. ამის შემდგომ კი მათ თავად დაიწყეს სხვადასხვა ნამუშევრების დამზადება.

სათემო კავშირ ”ღრელის” თავმჯდომარე, პროექტის ხელმძღვანელი მანანა იაძე ამბობს, რომ პროექტზე მუშაობისას რამდენიმე იდეას განიხილავდნენ. თუმცა, საბლოოდ. არჩევანი თექის წარმოებაზე შეაჩერეს და ეს შემთხვევით არ მომხდარა.

”ამით, ორი რამ გავკეთეთ, პირველი ის, რომ სოფელში ცოტა თუ მისდევდა მეცხვარეობას და ახლა ამ ადამიანების რაოდენობა გაიზარდა. მეორეც, ამით ხელი შევუწყეთ ძირძველი ქართული ხელობის აღდგენას”, - ამბობს იგი და ამატებს, რომ შემთხვევით არც პროექტის მონაწილეები შეურჩევიათ, - ”ამ ადამიანებმა შეისწავლეს ხელობა, გაუჩნდათ საქმე და სამომავლოდ, როგორც კი სოციალურ საწარმოდ დავფუნძდებით, ამ საქმიდან უკვე მოგებასაც მივიღებთ”.

მისივე თქმით, მას შემდეგ, რას იურიდიულ საკითხებს მოაგვარებენ და სოციალურ საწარმოდ დაფუნძდებიან, ნამუშევრებს რეგიონის ტურისტულ ობიექტებზე გასაყიდად გაიტანენ.





[ნინო ნარიმანიშვილი, ახალციხე]