იზოლირებული გამოფენა და უკმაყოფილო რეწვის ოსტატები

სათემო კავშირმა ”ღრელმა” თექის ნამუშევართა გამოფენა-გაყიდვისთვის მზადება დღის თორმეტი საათიდან დაიწყო.

- ”სამი საათია აქ ვართ, გამოფენილი გვაქვს თექაზე ნამუშევრები, მაგრამ ჯერ არაფერი გაყიდულა”, -ამბობს სათემო კავშირის ხელმძღვანელი მანანა იაძე.

იაძის მსგავსად მყიდველს მთელი დღის განმავლობაში ელოდა მაია მაისურაძეც. მან გამოფენაზე ბისრებისგან დამზადებული ნამუშევრები გამოიტანა.

მათგან განსხვავებით, ხეზე ნამუშევარი ნივთები მხოლოდ დასათვალიერებლად გამოიტანა ალფეზ გაბაშვილმა.

- ”თითო ნივთის დამზადებას ერთი თვე მაინც სჭირდება, ამიტომ გაყიდვისგან ყოველთვის თავს ვიკავებ. წარმოდგენილი მაქვს კაკლის, პანტის,თუთის,წიფელის ხისგან დამზადებული დოქები, ვაზები და სხვადასხვა ნივთები”, - გვითხრა მან.

გამოფენაში ახალციხის სამხატვრო სკოლაც მონაწილეობდა. მათ რამდენიმე ნამუშევარი გაყიდეს. სამხატვრო სკოლამ კერამიკის, ვიტრაჟული მინისა და ხის ნამუშევრები გამოფინა. გარდა ამისა, წარმოდგენილი ჰქონდათ ახალციხის ციხის ხედებით მოხატული ჭიქები.

სპეციალურად გამოფენისთვის ჩამოვიდა სოფელ მუსხში მცხოვრები 79 წლის მარიამ ჟუჟუნაძეც. ”მან სტუმრებისთვის საკუთარი ხელით მოქსოვილი ხალიჩა-ფარდაგები გამოფინა.

იმის გამო, რომ ახალციხის ციხიდან მოშორებით არსებულ ტერიტორიაზე დამთვალიერებლისა და მყიდველის სიმცირე იყო, გამოფენა დაგეგმილზე ადრე, საღამოს 20:00 საათზე დასრულდა.

- ”ალბათ არ იყო ყველაფერი სწორად გათვლილი. არცერთი ნივთი არ გაყიდულა”, - გვითხრა მარინა ვახტანგიშვილმა, რომელსაც თექის ნამუშევრები ჰქონდა წარმოდგენილი.

უკმაყოფილება ვერ დაფარა სამხატრო სკოლის დირექტორმა ნანა ნათენაძემ: ”არაჩვეულებრივი გამოფენა მოეწყო. ამ დღითვის ყველა ხელოვანი განსაკუთრებით ვემზადებოდით. აღმოჩნდა, რომ არა თუ ტურისტი ადგილობრივებიც კი არ მოვიდნენ. აბსოლუტურად იზოლირებულები ვიყავით. მთავარი ის არ არის რა გაიყიდა. ხელოვნება გვინდოდა გვეჩვენებინა ხალხისთვის და ამიტომ უფრო დაგვწყდა გული”.

- ”ჩვენ შეთავაზებაზე, რომ გამოფნა რაბათის ტერიტორიაზე მოგვეწყო, უარი მივიღეთ, თუმცა ტკბილეულის და ბურთებით მოვაჭრეებისთვის უარი არ უთქვამთ. ეს იყო ხალხური რეწვის ოსტატების იგნორირება. ჩვენ გვინდოდა, რომ სტუმრებს ენახათ ჩვენი კუთხის ხელოვნება”, - გვითხრა ალფეზ გაბაშვილმა.

კლიენტების სიმცირეს უჩიოდნენ სადგურის მომდებარე ტერიტორიაზე მდგარი ცივი სასმელები გამყიდველებიც.

- ”სამწუხაროდ ძალიან ცოტა ხალხია. ამ ტერიტორიაზე გზა ჩაკეტილია და ჩვენამდე მოსვლას ვერ ახერხებენ, თუმცა წასვლას არ ვაპირებთ, ვიმედოვნებთ რომ საღამოს გზა გაიხსნება და მყიდველიც გამოჩნდება”, - გვითხრეს ცივი სასმელების გამყიდველებმა.







[img]http://old.sknews.ge/uploads/posts/2012-08/1345136838_03.jpg[/im

[img]http://old.sknews.ge/uploads/posts/2012-08/1345136876_gamocdebi_01.jpg[/img]

[თინათინ ზაზაძე, ახალციხე]