ახალციხეში შშმ პირთა ნამუშევრების საშობაო გამოფენა–გაყიდვა გაიმართა

ბენეფიციარებმა საშობაო ნივთები ხის, თექის, ცივი სილიკონის, პლასტმასისა და ნაჭრისგან დაამზადეს. დამთვალიერებლებს ანგელოზების, თოვლის ბაბუების, ნაძვის ხეების და სხვადასხვა სახის საახალწლო აქსესუარების შეძენა სიმბოლურ ფასად შეეძლოთ.

„სუვენირების დამზადებაში ყველა ბენეფიციარი იღებდა მონაწილეობას. ძველი და გამოუსადეგარი ნივთებისგან ვქმნით ასეთ ნამუშევრებს“,–ამბობს „ტალიტა კუმის“ ფიზიოთერაპიის ასისტენტი, პედაგოგი მელანო ჩილინგარაშვილი.

მისი თქმით, დღის ცენტრში არტ–თერაპიის კურსს 20 ბენეფიციარი გადის, რომლებიც სხვადასხვა ხელსაქმეს სწავლობენ.

გამოფენა–გაყიდვაში მონაწილეობა ორგანიზაციის „ისინი ჩვენს შორის არიან“ ბენეფიციარებმაც მიიღეს, რომლებმაც ხისგან გამოთლილი კუბიკებისგან შექმნილი განმავითარებელი სათამაშოები გამოფინეს.

როგორც ორგანიზაციის თავმჯომარე მანანა იაძე ამბობს, ეს ნამუშევრები ბავშვებს სხვადასხვა უნარების განვითრებაში ეხმარება.











[მარიამ ბარძიმაძე, ახალციხე]