„გისოსებს გარეთ“ - ყოფილი პატიმრების ნამუშევრების გამოფენა ახალციხეში

ნაქარგი ხატები, თექით შესრულებული სხვადასხვა ნამუშევრები, ნახატები, ხის ნაკეთობები, სამკაულები - იმ ნამუშევრების მცირე ჩამონათვალია, რომლებზეც ავტორები, ყოფილი პატიმრები, ხუთი თვის განმავლობაში მუშაობდნენ.

გამოფენა - გაყიდვა დღეს, 18 ოქტომბერს ახალციხის ციხის საგამოფენო დარბაზში მოეწყო. გამოფენა-გაყიდვაზე 80-ზე მეტი ნამუშევარი იყო წარმოდგენილი.

„გისოსებს გარეთ“ - ამ სახელწოდების გამოფენა, სამცხე-ჯავახეთის რეგიონული ასოციაცია „ტოლერანტის“ ორგანიზებით, ევროკავშირის მიერ დაფინანსებული პროექტის „ყოფილი პატიმრების საზოგადოებაში ინტეგრაციისა და რეაბილიტაციის ხელშეწყობა სამცხე-ჯავახეთის რეგიონში“ ფარგლებში გაიმართა.

ორგანიზაციის მენეჯერის, გოჩა ნათენაძის თქმით, ამ გამოფენით ყოფილი პატიმრები თვითრეალიზებას და საზოგადოებრივ პროცესებში აქტიურად ჩართვას შეძლებენ: „მათ განვითარების საშუალება აქვთ. სამომავლოდ სტიმული ეძლევათ, იმისა, რომ განავითარონ თავიანთი საქმიანობა, რათა დამატებითი შემოსავალი ჰქონდეთ“.

გამოფენა-გაყიდვას სასჯელაღსრულების, პრობაციისა და იურიდიული დახმარების საკითხთა სამინისტროს, ევროკავშირის, საერთაშორისო ორგანიზაციებისა და იმ არასამთავრობო ორგანიზაციების წარმომადგენლები ესწრებოდნენ, რომლებიც წლების განმავლობაში საპატიმროებში მუშაობენ.

გამოფენაზე ქალთა ციხის ერთ-ერთი პატიმრის ოთხი ნახატი მოხვდა. მან ეს ნამუშევრები ორგანიზაცია „სამოქალაქო ცნობიერებისა განვითარების ცენტრის“ პროექტის ფარგლებში, ქალთა ციხეში ყოფნისას შექმნა. პროექტი „განათლებისა და სამუშაო შესაძლებლობების ხელმისაწვდომობა ახალგაზრდა მსჯავრდებულთათავის“ აღნიშნულმა ორგანიზაციამ ქსნის #15 დაწესეულებასა და ქალთა ციხეში განახორციელა.

„სამოქალაქო ცნობიერებისა განვითარების ცენტრის“ დირექტორის მარინე ქევხიშვილის თქმით, გარდა იმისა, რომ მსგავსი პროგრამების გავლის შემდეგ ყოფილი პატიმრები საზოგადოებაში ადგილს იმკვიდრებენ, ამით მცირდება ხელახალი დანაშაულის ჩადენის შემთხვევებიც: „ძალიან ბევრი შემთხვევაა, როცა ადამიანები გულაცრუებულები არიან, ვერ გრძნობენ ხალხის თანადგომას, ამიტომ ისევ დანაშაულს ჩადიან. ამით კი მსგავსი შემთხვევები შემცირდება და საზოგადოებაც დაცული იქნება“.

[მანანა სარაშვილი, ახალციხე]