‘ბავშვები ვერ იცავენ ჰიგიენას’– პირველი სკოლის დირექტორი მოუწესრიგებელ საპირფარეშოებზე

„სამხრეთის კარიბჭესთან“ ახალციხის ახლადგარემონტებული, პირველი საჯარო სკოლის მოსწავლეები ჰყვებიან, რომ ტუალეტებში გაუსაძლისი სუნია, არ არის არც საპონია და არც ქაღალდი, ასევე, დაზიანებულია საკეტები.

სკოლის დირექტორი ჟუჟუნა გოგოლაური ირწმუნება, რომ სკოლაში ტუალეტები ყოველთვის მოწესრიგებულია: „მაღალი კლასების მოსწავლეების საპირფარეშოში ქაღალდი ყოველთვისაა, მაგრამ ხშირად მოსწავლეები ასველებენ და ძირს აგდებენ. რაც შეეხება დაბალი კლასების საპირფარეშოს, ქაღალდი აქაცაა. თუმცა, აქაც ძირს აგდებენ ქაღალდებს, ამიტომ პატარებისთვის ქაღალდს კლასებში ვტოვებთ და იქიდან გამოაქვთ როცა სჭირდებათ".

რაც შეეხება საპონს, როგორც დირექტორი ამბობს, სკოლაში ყოველთვის თხევად საპონს იყენებენ: „სპეციალური ყუთებით კედლებზეა მიმაგრებული, შეიძლება მოსწავლემ ვერ დაინახოს. მაგალითად, გუშინ რომ შემოვედი საპირფარეშოში ეს თხევადი საპონი სულ ძირს ესხა, ამ ყუთს აზიანებენ მოსწავლეები“.

სკოლაში ტუალეტების დაზიანებული საკეტების შესახებ დირექტორი ამბობს, რომ მას შემდეგ რაც ახლადგარემონტებულ შენობაში შევიდნენ, საკეტები არა ერთხელ გამოცვალეს, თუმცა ისევ ზიანდება: „იმ მშენებელმა კომპანიამ, რომელიც სკოლის რემონტზე თავდაპირველად მუშაობდა, საკეტები ცუდად გააკეთა. როცა ფუჭდება შემკეთებელს ის კომპანია გივგზავნის, რომელმაც სკოლის რეაბილიტაცია დაასრულა. ახლაც ველოდებით შემკეთებლებს, რომ კიდევ ერთხელ თავიდან დაამაგრონ“.

სკოლის ადმინისტრაციაში აცხადებენ, რომ საპირფარეშოები ყოველთვის იწმინდება, თუმცა გაუსაძლისი სუნი საკანალიზაციო სისტემიდან ამოდის და ამას ვერაფერს შველიან: „სკოლის კანალიზაციის ქსელი მიერთებულია სხვა ქსელზე, ამიტომ ხშირად თუ ვინმე რამეს ჩაასხამს მილში, სუნი სკოლაში დგება“.

რაც შეეხება შშმ პირებისთვის განკუთვნილ საპირფარეშოს, რომელიც დაკეტილია, დირექტორი ამბობს რომ სკოლაში ასეთი პირები არ ჰყავთ, შესაბამისად მისი ფუნქციონირების საჭიროება არ არსებობს.

პირველი სკოლის რემონტი თითქმის ორი წლის განმავლობაში მიმდინარეობდა. სკოლა 2017 წლის დეკემბერში საზეიმოდ გაიხსნა.

[მარიამ ბარძიმაძე, ახალციხე]