სწავლა სხვის სკოლაში

ახალციხეში, შოთა რუსთაველის სახელობის პირველ საჯარო სკოლაში,სასწავლო პროცესი ჯერ ისევ არ განახლებულა. აქ სასკოლო ზარის ხმისა და მოსწავლეების ჟრიამულის ნაცვლად, მუშების გადაძახილი და სხვადასხვა ელექტროხელსაწყოს ხმა ისმის.

მშენებელმა კომპანიამ, რომელიც პირველ სკოლას არემონტებს, სამუშაოები ამ დრომდე ვერ დაასრულა. სკოლაში მუშები ახლა კედლებს ღებავენ, შემდეგ კი საკლასო ოთახებში იატაკის დაგება უნდა დაიწყონ.

ამასობაში კი, დროებით სხვა სკოლებში თავშეფარებულ პირველ სკოლას არაერთი გამოწვევის დაძლევა მოუხდა.

ახალიხის პირველი საჯარო სკოლის 950 მოსწავლე, მესამე და მეექვსე სკოლების შენობებში, დღის მეორე ცვლაში სწავლობს. პირველი საჯარო სკოლის მასწავლებლები ამბობენ, რომ მესამე საჯარო სკოლაში, სადაც გასათბობად ღუმელებს იყენებენ, კლასების შეკვეცა მოუხდათ, – მეშვიდე, მეათე და მეთერთმეტე კლასები, სადაც ოთხ-ოთხი პარალელური კლასი იყო, გამსხვილდა და ახლა ოთხის ნაცვლად სამი პარალელური კლასია.

„თუ სკოლის რებილიტაცია ვადებში არ ჩაჯდა და ჩვენ სკოლაში არ დავბრუნდით, სკოლა დაგვეშლება“, – ამბობს პირველი სკოლის მასწავლებელი მაკა ჯანაშვილი.

კლასების შეკვეცის შესახებ, სკოლის სამეურვეო საბჭო 28–29 სექტემბერს მსჯელობდა, 30–ში კი პედსაბჭომ გადაწყვეტილება მიიღო.
რატომ გახდა აუილებელი კლასების გაერთიანება, პირველი სკოლის დირექტორი, ჟუჟუნა გოგოლაური ამაზე საუბრისგან თავს იკავებს.

დირექტორის დუმილის ფონზე, პრეტენზიებს არ მალავენ სკოლის მასწავლებლები, თუმცა, საჯაროდ ამის თქმისგან, ჯერ ისინიც თავს იკავებენ. მასწავლებლები ამბობენ, რომ კლასების გამსხვილების გამო, მათ საათები და შესაბამისად, ანაზღაურება მოაკლდათ.

მართალია, საჯაროდ პროტესტი არ გამოუთქვამთ, მაგრამ, ვითარებაში გასარკვევად, გასულ თვეში, მასწავლებლები პირველი სკოლის ეზოში შეიკრიბნენ. ისინი ცდილობდნენ მშენებლებისგან გაერკვიათ, როდის უნდა დასრულდეს სკოლის რემონტი.

მაშინ, სკოლის ეზოში „სამხრეთის კარიბჭეს“ გამოჩენა, დირექტორს არ ესიამოვნა.

„თქვენ აქ ვინ დაგპატიჟათ?! ჩვენ უბრალოდ შენობის დასათვალიერებლად მოვედით“, – გვითხრა სკოლის დირექტორმა.

ახალციხის პირველი საჯარო სკოლის შენობის რეაბილიტაციას აშშ-ის ათასწლეულის გამოწვევის კორპორაცია (“Millennium Challenge Corporation- MCC”) აფინანსებს. ტენდერში გამარჯვებულ კომპანიასთან ხელშეკრულებას 2015 წლის 19 ნოემბერს მოეწერა ხელი, სამუშაოები კი 2016 წლის 12 იანვარს დაიწყო.

ჯამში, სარეაბილიტაციო სამუშაოებისთვის, 395.000 ამერიკული დოლარი უნდა დახარჯულიყო, თუმცა დამატებით შესრულებული სამუშაოებისთვის პროექტში ცვლილებები დაახლოებით 37 000 დოლარის ღირებულების ფარგლებში კიდევ განხორციელდა.
პირველი სკოლის რემონტი სწავლის დაწყებამდე უნდა დასრულებულიყო, თუმცა, ვადამ ჯერ სექტემბრის, შემდეგ კი ოქტომბრის ბოლომდე გადაიწია.

როდის უნდა დასრულდეს საბოლოოდ სკოლის რემონტი, ამ ეტაპზე გაურკვეველია. მშენებელი კომპანიის, „ინტერ პლუსის“ ფინანსური დირექტორი კითხვაზე არ გვპასუხობს, იმ მოტივით, რომ ეს მისი კომპეტენცია არაა.

ერთადერთი, რაც ამ ეტაპზე ცნობილია, არის ის, რომ პირველი საჯარო სკოლის გაჭიანურებულ სარეაბილიტაციო სამუშაოებს, “ათასწლეულების გამოწვევის კორპორაციაში“ შექმნილი სპეციალური კომისია სწავლობს.

როგორც „სამხრეთის კარიბჭესთან“ საქართველოს მთავრობასთან, ბიზნესთან და საზოგადოებასთან ურთიერთობის დირექტორი გიორგი კოპალეიშვილი ამბობს, კომისიის დასკვნის შემდეგ გაირკვევა, რა სახის ჯარიმა დაეკისრება მშენებელ კომპანიას ვადის გადაცილებისთვის.
დღევანდელი მოცემულობიდან გამომდინარე, როდის შეიძლება დაუბრუნდნენ პირველი სკოლის მოსწავლეები მშობიურ სკოლას, ამაზე პასუხი კი არც კოპალეიშვილს აქვს.





[ლუბა გიორგაძე, ახალციხე]