პირველ სკოლაში რემონტი მარტამდე ვერ სრულდება

ამის შესახებ „სამხრეთის კარიბჭესთან“ „ათასწლეულის გამოწვევის ფონდში“ აცხადებენ.

„დღეს არსებული ვითარებით და იმის გათვალისწინებით როგორც მიმდინარეობს პროცესები მარტის ბოლომდე დასრულებას აღარ ველოდებით. კომპანიას ჯარიმა ყოველდღიურად ისევ ერიცხება და ის უკვე ჩვენ შავ სიაშიც არის“, – ამბობს "ათასწლეულის გამოწვევის ფონდის" საზოგადოებასთან ურთიერთობის სამსახურის წარმომადგენელი გიორგი კოპალეიშვილი.

მისი თქმით, გარდა იმისა რომ სამშენებლო სამუშაოებია დასასრულებელი, დამკვეთს არ მოსწონს უკვე დასრულებული სამუშაოებიც: „მაგალითად, გარე ფასადი როგორც არის შეღებილი ასე არ ჩავიბარებთ და შევაცვლევინებთ“.

შეგახსნებთ, მშენებელ კომპანიაში „ინტერ პლიუსში“ აცხადებდნენ, რომ შენობას წლის ბოლოს დატოვებდნენ და მომავალი წლიდან აქ სასწავლო პროცესის განახლება შესაძლებელი იქნებოდა, თუმცა სკოლაში მუშაობას მათი წარმომადგენლები ჯერ კიდევ აგრძელებენ.

პირველ სკოლაში რემონტი სახელშეკრულებო პირობების მიხედვით 2016 წლის აგვისტოში უნდა დასრულებულიყო. ვადების დარღვევაში დამკვეთი „ათასწლეულის გამოწვევის ფონდი“ შემსრულებელს „ინტერ პლიუსს“ ადანაშაულებს. მშენებელი კი პირიქით, დამკვეთს არასრულყოფილი პროექტის შედგენაში სდებს ბრალს.

[თამუნა უჩიძე, ახალციხე]