არლის სკოლის მოსწავლეები ახალ სასწავლო წელს ისევ ძველ შენობაში ხვდებიან

არლის საჯარო სკოლის მოსწავლეებს 2018–2019 სასწავლო წლის დაწყება ისევ ავარიულ და ნათხოვარ შენობაში მოუხდათ. კომპანიამ, რომელიც მშენებლობის დასრულებას სწავლის დაწყებამდე გეგმავდა, ვერ შეძლო.

„რამდენიმე დღე დენი იყო გათიშული, დღეს კი ცუდმა ამინდმა შეუშალა ხელი. ისევ ძველ სკოლაში ვხვდებით ახალ სასწავლო წელს. ტექნიკური შეფერხებებია, ასე აქტიურად რომ ემუშავათ გასულ წელსაც, მშენებლობა უკვე დასრულებული იქნებოდა“, – ამბობს არლის საჯარო სკოლის დირექტორი მარო ჩხიტუნიძე.

სკოლის დირექტორი ვარაუდობს, რომ კომპანია მუშაობას სექტემბრის ბოლომდე დაასრულებს, ოქტომბრიდან კი ახალ სკოლაში გადასვლას შეძლებენ.

შეგახსენებთ, რომ არლის საჯარო სკოლის მშენებლობა 2015 წლის დასაწყისში დაიწყო. მშენებლობა ერთ წელიწადში უნდა დასრულებულიყო.
სამუშაოებს ტენდერში გამარჯვებული კომპანია შპს "Civil Construction" ასრულებდა, თუმცა მისი ხელმძღვანელის გარდაცვალების გამო, მშენებლობა შეჩერდა და ის რაც უკვე გაკეთებული იყო, ნადგურდებოდა. ამ პერიოდში, ახალი მშენებლის შესარჩევად გამოცხადებული ტენდერი პირველ მცდელობაზე ჩავარდა და მშენებლის შერჩევაც დაგვიანდა. ამ ეტაპზე სკოლაში სამშენებლო სამუშაოებს კომპანია „Rooms–ი“ ასრულებს. სკოლის მშენებლობის დასრულებისთვის 540 000 ლარია გათვალისწინებული.

არლის ახალი სკოლა 192 მოსწავლეზეა გათვლილი. შენობა ადაპტირებულია შშმ პირებისთვის. მშენებლობის დასრულებამდე მოსწავლეები სოფელში არსებულ კათოლიკურ და მართლმადიდებლურ სამრევლო სკოლების შენობებში არიან გადანაწილებული.

[თინათინ ზაზაძე, ადიგენი]