მესხეთის თეატრში რვა პრემიერის ნაცვლად ხუთს გამართავენ

ამის შესახებ „სამხრეთის კარიბჭესთან“ მესხეთის სახელმწიფო დრამატული თეატრის დირექტორმა ირაკლი ათუნაშვილმა განაცხდა: "წლის განმავლობაში რვა პრემიერას ყოველთვის ვმართავდით–ხოლმე და ახლა მინიმუმ ხუთს მაინც დავდგამთ. დაფინანსება თვითმმართველობიდან 30 000 ლარით გაგვეზრდება. მაგრამ თანხას ხელფასებში როგორ გადავანაწილებთ ჯერ გარკვეული არაა“, – ამბობს ათუნაშვილი.

როგორც თეატრის ადმინისტრაციაში აცხადებენ, თითო პრემიერის დადგმა ყველა ხარჯის გათვალისწინებით 15 000–მდე ჯდება. უცხოელი რეჟისორის მოწვევის შემთხვევაში კი 22 000: „თუ უცხოელი რეჟისორი ჩამოგყავს ეს იმას ნიშნავს, რომ მაღალ მხარვტულ დონეზე გაქვს მოთხოვნა. იმას ბუნებრივია, სჭირდება სასტუმრო, კვება, სადადგმო ხარჯი, ტრანსპორტი, სცენოგრაფია, მხატვარ რეჟისორი, დეკორატორი, დურგალი. ამ ყველაფრის გათვალისწინებით 20–22 ათასზე მაინც ადის თანხა".

მიმდინარე წელს მესხეთის თეატრის დაფინანსება 305 000 ლარია. აქედან კულტურის სამინისტროდან გამოყოფილი 225 000 ლარი შრომის ანაზღაურების, 80 000 კი სადადგმო ხარჯია. ამას ემატება თვითმმართველობიდან თეატრისთვის გაწერილი 50 000 ლარი, რაც მიმდინარე წელს 80 000–მდე გაიზრდება.

მესხეთის თეატრის მსახიობები დაბალ ხელფასებს აპროტესტებენ. ანაზღაურების მომატების მიზნით, მათ შეხვედრა, 21 თებერვალს, სამცხე–ჯავახეთში მხარის რწმუნებულთან და ახალციხის მერთან გამართეს. თვითმმართველობიდან თეატრმა თანხის დამატების შესახებ დაპირება სწორედ ამ დღეს მიიღო, ამავე დღეს ისაუბრეს პრემიერების რაოდენობის შემცირებაზეც.

თეატრს შტატით 40, ხოლო ხელშეკრულებით აყვანილი რვა თანამშრომელი ჰყავს. დასში სულ 16 მსახიობია.

[მარიამ ბარძიმაძე, ახალციხე]