რამდენ ლარს გამოყოფს მერია თეატრში ხელფასების გასაზრდელად, 25 თებერვალს გაირკვევა

ამის შესახებ „სამხრეთის კარიბჭესთან“ სამცხე–ჯავახეთის სამხარეო ადმინისტრაციაში მუნიციპალიტეტებთან ურთიერთობის სამსახურის ხელმძღვანელმა ეკა ორჯონიკიძემ განაცხადა.

„გავიგეთ, რომ თეატრში მდგომარეობა კრიტიკული იყო. კულტურის სამინისტროსთან ამ საკითხზე საუბრის შემდეგ გაირკვა, რომ მათი მხრიდან ხელფასების მომატების შესახებ გადაწყვეტილების მიღებას ხანგრძლივი პერიოდი სჭირდებოდა. ამიტომ შევჯერდით იმაზე, რომ მუნიციპალიტეტიდან გარკვეული თანხები გამოიყოფა, ასევე, თეატრს შევთავაზეთ, რომ შვიდი პრემიერის ნაცვლად ოთხი პრემიერა გამართოს და თანხები ხელფასებზე გადაანაწილოს“.

ადგილობრივი ბიუჯეტიდან თეატრისთვის თანხის დამატება რომ იგეგმება, ეს ახალციხის მერიაშიც დაგვიდასტურეს. თუმცა, რა ოდენობაზეა საუბარი თვითმმართველობაში ჯერ არ საუბრობენ.

ეკა ორჯონიკიძე კი ამბობ, რომ მერიის წარმომადგენლები თეატრის მსახიობებს ორშაბათს, 25 თებერვლას შეხვდებიან და დამატებთ გამოყოფილი თანხის ოდენობას გააცნობენ: „გუშინ მერს შეხვედრაზე კონკრეტული თანხა არ დაუსახელებია, თუმცა ხარჯთაღრიცხვა მიმდინარეობს და ორშაბათს გახდება ცნობილი, თუ რა რაოდენობით გაიზრდება მსახიობების ხელფასები“.

2019 წელს მესხეთის თეატრი სახელმწიფო ბიუჯეტიდან 225 000 ლარით ფინანსდება, ადგილობრივი თვითმმართველობიდან კი 50 000 ლარით. მსახიობების ხელფასი ხელზე ასაღები 280–დან 480–ლარამდეა. შემოქმედებით დასის წევრები ამბობენ, რომ ეს თანხა ძაიან მიზერულია და ხელფასების მომატებას ითხოვენ.

თეატრს შტატით 40, ხოლო ხელშეკრულებით აყვანილი რვა თანამშრომელი ჰყავს. თეატრში 16 მსახიობია.

[ავთო ინასარიძე, ახალციხე]