სამხარეო ადმინისტრაციაში მესხეთის თეატრის ბიუჯეტზე იმსჯელებენ

მესხეთის თეატრის დირექტორი ირაკლი ათუნაშვილი, სამხარეო ადმინისტრაციაში, ადგილობრივი თვითმმართველობის ორგანოებთან ურთიერთობის სამსახურის უფროსთან ეკატერინე ორჯონიკიძესთან ერთად მიმდინარე წლის ბიუჯეტს განიხილავს.

„დღევანდელ შეხვედრაზე თეატრი წარმოადგენს ხარჯთაღრიცხვას და გავიგებთ, რამდენი სპექტაკლი უნდა დაიდგას და რამდენი თანხა უნდა მივცეთ თეატრს იმისთვის, რომ მსახიობები არსად არ წავიდნენ“, – ამბობს ეკატერინე ორჯონიკიძე.

მესხეთის სახელმწიფო დრამატული თეატრში აცხადებენ, რომ სამხარეო ადმინისტრაციაში წარსადგენ დოკუმენტზე მუშაობენ და შეხვედრა, რომელზეც მას განიხილავენ დღის ბოლომდე გაიმართება.

„ადგილობრივმა მთავრობამ დაადასტურა ჩვენი დახმარების მზაობა. ახლა ვმუშაობ დოკუმენტებზე და დღის განმავლობაში შევხვდები სამხარეო ადმინისტრაციის წარმომადგენელს იმის გასარკვევად, თუ რა ფორმით და როგორ მოხდება ჩვენი დაკმაყოფილება“, – გვითხრა ირაკლი ათუნაშვილმა.

მესხეთის თეატრის მსახიობები დაბალ ხელფასებს აპროტესტებენ. ანაზღაურების მომატების მიზნით, მათ შეხვედრა, 21 თებერვალს, სამცხე–ჯავახეთში მხარის რწმუნებულთან და ახალციხის მერთან გამართეს. შეხვედრაზე ხელისუფლების წარმომადგენლების მხრიდან გამოითქვა მოსაზრება, რომ თეატრში წლის განმავლობაში შედარებით ნაკლები, მაგალითად, შვიდის ნაცვლად ოთხი პრემიერა გაიმართოს და თანხა მსახიობებს ხელფასს ამის ხარჯზე დაემატოს. ამავე დღეს გადაწყდა, რომ ახალციხის მერია თეატრს მიმდინარე წელს დაფინანსებას გაუზრდის.

2019 წელს მესხეთის თეატრი სახელმწიფო ბიუჯეტიდან 225 000 ლარით ფინანსდება, ადგილობრივი თვითმმართველობიდან კი 50 000 ლარით.
თეატრს შტატით 40, ხოლო ხელშეკრულებით აყვანილი რვა თანამშრომელი ჰყავს. თეატრში 16 მსახიობია.

[ავთო ინასარიძე, ახალციხე]