ახალციხის მერია მესხეთის თეატრს სუბსიდიას უზრდის

ახალციხის მერიის მომავალი წლის ბიუჯეტში, მესხეთის სახელმწიფო დრამატული თეატრის დაფინანსების საკითხი უკვე გადაწყვეტილია. სპექტაკლების დასადგმელად ადგილობრვი ბიუჯეტიდან 80 ათასი ლარი დაიხარჯება, რაც 2015 წლის დაფინანსებასთან შედარებით 20 ათასი ლარით მეტია.

„2016 წლის სეზონზე ჩვენ გვექნება რვა ახალი პრემიერა. მერი თვითონ იყო დაინტერესებული, რომ დავეფინანსებინეთ. ეს თანხა თეატრისთვის მცირეა, მაგრამ მაინც მადლიერებას გამოვხატავთ“, – ამბობს მესხეთის სახელმწიფო დრამატული თეატრის სამხატვრო ხელმძღვანელი ლია სულუაშვილი.

მისი თქმით, წელს მესხეთის თეატრში ცხრა პრემიერა დაიდგა, აქედან ექვსი ადგილობრივი ბიუჯეტიდან, სამი კი კულტურის სამინისტროს დაფინანსებით.

„ძალიან საინტერესო ინფორმაცია გვაქვს, ახალ სეზონზე რეჟისორი თემურ ჩხეიძე დადგამს ჩვენთან სპექტაკლს, ასევე, იგეგმება პოლონელი რეჟისორის სპექტაკლის დადგმაც. რა პიესები იქნება ჯერ გადაწყვეტილი არ არის“, – ამბობს სულუაშვილი.

თეატრის ბიუჯეტი 2016 წელს 330 ათასი ლარი იქნება, აქედან 250 ათას ლარს კულტურის სამინისტრო გამოყოფს.

თეატრში ამჟამად 76 თანამშრომელი მუშაობს, აქედან 20 ხელშეკრულებითაა აყვანილი.

[თინათინ ზაზაძე, ახალციხე]