მოქალაქეთა 56,7% ადგილობრივ ხელისუფლებას საერთოდ არ შეხვედრია

"დემოკრატ მესხთა კავშირის“ ბაზაზე არსებული „ახალგაზრდული საკრებულოს“ ახლგაზრდები კვლევას 10 ივნისიდან 15 ივლისამდე პერიოდში ატარებდნენ.

რამდენად ხშირად გიწევთ შეხვედრა ადგილობრივ თვითმართველობის ორგანოების წარმომადგენლებთან; ვინ არის პირველ რიგში პასუხისმგებელი სოფლებში არსებული პრობლემების მოგვარებაში; რამდენად კმაყოფილი ხართ ხელისუფლების წარმომადგენლების საქმიანობით; კმაყოფილი ხართ თუ არა „სოფლის მხარდაჭერის პროგრამის“ ფარგლებში შერჩეული პრიორიტეტებით; - ამ და მსგავსი შინაარსის საკითხებზე ახალგაზრდებმა ახალციხის მუნიციპალიტეტის 18 სოფელსა და ორ ქალაქში: ახალციხესა და ვალეში 1913 რესპონდენტი გამოკითხეს. ამათგან, 42% ქალი, 52% მამაკაცი.

კვლევის შედეგების მიხედვით, გამოკითხულთა 10% ადგილობრივი თვითმართველობის ორგანოების წარმომადგენლებს თვეში ერთხელ ხვდება. 33,3% - წელიწადში რამდენჯერმე, 56,7% კი საერთოდ არ შეხვედრია.

გამოკითხულთა 30,15 ფიქრობს, რომ სოფლებში არსებული პრობლემების მოგვარებაში პასუხისმგებელი პირველ რიგში სოფლის რწმუნებულია; 17,4% - პასუხისმგებლობას გამგებელს აკისრებს; 16,4% - თავად სოფლის მცხოვრებლებს; 14,8%- საკრებულოს თავმჯდომარეს; 12,3% -ადგილობრივი საკრებულოს წევრებს; 5,4% -ცენტრალურ ხელისუფლებას და მხოლოდ 2,4% - ფიქრობს, რომ სოფლის პრობლემების მოგვარება პირევლ რიგში გუბერნატორის პასუხისმგებლობაა.

ახალციხის მუნიციპალიტეტის საკრებულოს თავჯდომარემ ოლეგ სანდროშვილმა განაცხადა, რომ კვლევის შედეგებით კმაყოფილია და ეს დაეხმარება მოქალაქეებთან თანამშრომლობაში: „დავგეგმავთ, თუ როგორ უნდა განვახორციელოთ ურთიერთობები ჩვენს მოსახლეობასთან“.

აღნიშნული კვლევა „საქართველოს ასოციაციის“ მიერ დაფინანსებული პროექტის „ახალგაზრდული საკრებულოს“ ფარგლებში ჩატარდა. პროექტს არასამთავრობო ორგანიზაცია „დემოკრატ მესხთა კავშირი“ ახორციელებს.

„ჩვენი მთავრი მიზანი იყო გაგვერკვია თუ რამდენად არიან მოქალაქეები ჩართულები ადგილობრივ თვითმართველობის საქმიანობებში“,-ამბობს დემოკრატ მესხთა კავშირის წარმომადგენელი ჯაბა ნათენაძე.

პროექტი წლის ბოლომდე გრძელდება. ახალგაზრდა საკრებულოს წევრები სოფლებში მუშაობას აგრძელებენ.ბოლოს შეიმუშავებენ რეკომენდაციებს, რომელსაც ადგილობრივ ხელისუფლებას გააცნობენ.

[მანანა სარაშვილი, ახალციხე]