მოსახლეობის 7 პრიორიტეტი – კვლევის შედეგები

დასაქმება; განათლების ხარისხის ბაღებში, სკოლებსა და უნივერსიტეტებში; ჯანდაცვა; სოფლის ამბულატორიების არასაკმარისი რაოდენობა; ეზოებისა და სადარბაზოების მოუწესრიგებლობა; საზოგადოებრივი ტრანსპორტი და მოსახლეობის სურვილი, შეხვდნენ მუნიციპალიტეტების წარმომადგენლებს – ეს ის შვიდი საკითხია, რაც გამოკითხვის შედეგების მიხედვით, მოსახლეობისთვის მთავარი პრიორიტეტია.

გამოკითხვა არასამთავრობო ორგანიზაცია „დემოკრატ მესხთა კავშირის“ ბაზაზე არსებულმა ახალგაზრდების ჯგუფმა, პროექტის, ‘ნდობის მშენებლობა სამხრეთ კავკასიაში’ ფარგლებში ჩაატარა.

ქალაქ ახალციხესა და ახალციხის სოფლებში ახალგაზრდებმა ჯამში 1000 მოქალაქე გამოკითხეს.

„შედეგები არ არის მოულოდნელი. ვგეგმავთ, რომ ამ პრობლემებთან დაკავშირებით მერიაში რეკომენდაციები შევიტანოთ“, – ამბობს პროექტის „ნდობის მშენებლობა სამხრეთ კავკასიაში“ ადგილობრივი კოორდინატორი ჯაბა ნათენაძე.

კვლევის შედეგების პრეზენტაციას ახალგაზრდები, არასამთავრობო სექტორისა და ქალაქის მერიის წარმომადგენლები ესწრებოდნენ.
ახალციხის მერის მოადგილემ ზაზა თამარაშვილმა განაცხადა, რომ პრობლემები მერიისთვის ნაცნობია და მერია ინტენსიურად ცდილობს მათ მოგვარებას.

პროექტი "ნდობის მშენებლობა სამხრეთ კავკასიაში" საქართველოს გაეროს ასოციაციის დაფინანსებით ხორციელდება.



[ვარლამ წიკლაური, ახალციხე]