ბორჯომში ახალგაზრდული საკრებულოს თავმჯდომარე აირჩიეს

ბორჯომში, ახალგაზრდული საკრებულოს წევრები არასამთავრობო ორგანიზაცია "ადამიანი, კანონი, თავისუფლებას" რეგიონულ კოორდინატორსა და ბორჯომის საკრებულოს თავმჯდომარის მოადგილეს შეხვდნენ.

არასამთავრობო ორგანიზაცია "ადამიანი, კანონი, თავისუფლებას" რეგიონული კოორდინატორი ბაქარ ალავიძე ახალგაზრდული საკრებულოს წევრებს პროექტის მნიშვნელობაზე ესაუბრა. ბორჯომის მუნიციპალიტეტის საკრებულოს თავმჯდომარის მოადგილემ გიორგი ფერაძემ კი ახალგაზრდა დეპუტატებს ადგილობრივი თვითმმართველობების არჩევის პრინციპები, საკრებულოების ძირითადი უფლება-მოვალეობები და ფუნქციები გააცნო.

შეხვედრის ბოლოს, თვითმართველობის კანონის შესაბამისად, ახალგაზრდული საკრებულოს თავმჯდომარის არჩევნები ჩატარდა. ფარული კენჭისყრის შედეგად ხმათა უმრავლესობით, საკრებულოს თავმჯდომარედ ნინო გრიგალაშვილი აირჩიეს, ხოლო მის მოადგილედ გიორგი ლონდარიძე დასახელდა.

ახალგაზრდულ საკრებულოებში შეიქმნა თემატური კომისიები, რომლებიც შეესაბამება ადგილობრივ საკრებულოში არსებულ კომისიებს.

პროექტის ხელმძღვანელების თქმით, მოსწავლეები 6-თვიან ტრენინგებს გაივლიან და პროექტის განხორციელებაში ჩაერთვებიან.



[თამარ თოთაძე, ახალციხე]