'დემოკრატ მესხთა კავშირმა' ახალციხის თვითმმართველობას ანგარიშვალდებულების გაზრდის ინიციატივით მიმართა

529 ხელმოწერიანი პეტიცია „დემოკრატ მესხთა კავშირმა“ ახალციხის მუნიციპალიტეტის საკრებულოში, დღეს, 13 მაისს შეიტანა.

პეტიციასა და ხელმოწერების შეგროვებას წინ ორგანიზაციის მიერ შემუშავებული დადგენილება უძღოდა. დადგენილების პროექტის თანახმად, საკრებულოს დეპუტატები ვალდებული არიან საკუთარ ამომრჩევლებს, ექვს თვეში ერთხელ, შესრულებული სამუშაოს ანგარიში გააცნონ.

„ახალციხის მუნიციპალიტეტის საკრებულოს ოფიციალური წერილით მივმართეთ აღნიშნული დადგენილების პროექტი განეხილათ. გვიპასუხეს, რომ საკითხს საკრებულოს სხდომაზე განიხილავდნენ, თუმცა ჩემთვის გაუკვეველი მიზეზების გამო, არ განიხილეს“, – განმარტავს არასამთავრობო ორგანიზაცია „დემოკრატ მესხთა კავშირის“ წარმომადგენელი ჯაბა ნათენაძე.

ამის შემდგომ გადაწყვიტა ორგანიზაციამ ხელმოწერების შეგროვება. იმისათვის, რომ საკრებულოს სხდომაზე დადგენილების პროექტი განეხილათ, მუნიციპალიტეტში მცხოვრები ამომრჩევლების 1 პროცენტის ხელმოწერა უნდა შეგროვებულიყო. N37–ე ახალციხის საოლქო საარჩევნო კომისიის მონაცემებით, ახალციხის მუნიციპალიტეტის ამომრჩევლების ერთი პროცენტი 370 ადამიანია, ორგანიზაციამ გაცილებით მეტი, 529 ხელმოწერა შეაგროვა.

„ხელმოწერების ფურცელს თან ერთვოდა განმარტების ბარათი, შესაბამისად, მოსახლეობამ იცოდა რაზე აწერდა ხელს. ამის შემდეგ, საკრებულო ვალდებული იქნება აღნიშნული საკითხი განიხილოს“, – განმარტავს ჯაბა ნათენაძე.

დადგენილებაორგანიზაციამ პროექტის „ანგარიშვალდებული თვითმმართველობა“ ფარგლებში შეიმუშავა. კოალიციურ პროექტს საქართველოს ახალგაზრდა ეკონომისტთა ასოციაციის (საეა) იმერეთის წარმომადგენლობა, საქართველოს ახალგაზრდა იურისტთა ასოციაციის (საია) ქუთაისის ფილიალი, დემოკრატიის ინსტიტუტი (ბათუმი), საქართველოს დემოკრატიული განვითარების კავშირი (ოზურგეთი), ათინათი (ზუგდიდი), დემოკრატ მესხთა კავშირი (ახალციხე), სიდა (რუსთავი) და საქართველოს სამოქალაქო განვითარების ასოციაცია (ლაგოდეხი) ახორციელებენ.

პროექტი საქართველოს შვიდ მუნიციპალიტეტში ხორციელდება.

[თამარ თოთაძე, ახალციხე]