ახალციხეში ახალგაზრდებმა ქვეითად გადასასვლელი მოხატეს

ახალციხის ცენტრალურ ქუჩაზე ზებრა გადასასვლელი გუშინ, 8 სექტემბერს მოიხატა.ღონისძიებაში მონაწილეობა "დემოკრატ მესხთა კავშირის" ახალგაზრდული პროგრამის წევრებმა მიიღეს.

ღონისძიების მიზანს, ქალაქში არსებული ზებრა გადასასვლელების პოლულარიზაცია და ქვეითად მოსიარულეების უსაფრთხოდ გადაადგილება წარმოადგენდა.

"ჩვენ გადავწყვიტეთ განსხვავებული, მიმზიდველი და შესამჩნევი ფორმა მიგვეცა გადასასვლელისთვის, განსაკუთრებით კი პატარებისთვის არის ეს გადასასვლელი, მიზანიც სწორედ მათი უსაფრთხო გადაადგილებაა,"–ამბობს "დემოკრატ მესხთა კავშირის" წარმომადგენელი ჯაბა ნათენაძე.

"დემოკრატ მესხთა კავშირის" ახალგაზრდული პროგრამის მონაწილეებს ქვეითად გადასასვლელის მოხატვაში დახმარება, ქალაქ ახალციხის მუნიციპალიტეტის მერიამ და შპს "გზაჯვარედინმა" გაუწია, მონაწილეთა უსაფრთხოებას კი საპატრულო პოლიცია უზრუნველყოფდა.

ღონისძიება, ტოლერანტობის სამოქალაქო ცნობიერებისა და ინტეგრაციის მხარდაჭერის (PITA) პროგრამის ფარგლებში განხორციელდა. მისი ფინანსური მხარდამჭერები საქართველოს გაეროს ასოციაცია და აშშ-ს საერთაშორისო განვითარების სააგენტოა. პროგრამის პარტნიორი სამცხე–ჯავახეთში "დემოკრატ მესხთა კავშირია".




[sknews.ge]