რეგიონის განვითარების ფონდის დასაფუძნებლად ბოლო დეტალები ზუსტდება

შეხვედრა დღეს, 8 ივლისს „დემოკრატიული ჩართულობის ცენტრში“ შედგა.

„ვისაუბრეთ იმ საკითხებზე, როგორი უნდა იყოს „მესხეთ-ჯავახეთის აღორძინების ფონდი“, რა საკითხებზე უნდა იმუშაოს, ვინ იქნება ფონდის გამგეობაში, მრჩეველთა კორპუსში და ასე შემდეგ“, - განმარტავს არასამთავრობო ორგანიცაზია „ადამიანის უფლებათა საყოველთაო დეკლარაციისთვის“ თავმჯდომარე და საინიციატივო ჯგუფის წევრი ზურა ხუციშვილი.

საინიციატივო ჯგუფის წარმომადგენლების თქმით, ფონდის მორიგი შეხვედრა ხუთშაბათს, 11:00 საათზე გაიმართება. ამ დღეს დაფუძნდება ფონდიც.

„ჩვენი მიზანია რეგიონის განვითარებისთვის ხელის შეწყობა. ფონდი ყველა იმ პრობლემის მოგვარებაზე იმუშავებს, რაც სამცხე-ჯავახეთში არსებობს. ეს იქნება ადამიანის უფლებების დაცვა, სოციალური, ეკოლოგიური და სხვა პრობლემები“, - ამბობს საინიციატივო ჯგუფის წევრი დავით ბერიძე.

„მესხეთ-ჯავახეთის აღორძინების ფონდის“ მიზანი რეგიონის განვითარებაზე ზრუნვაა. ფონდში რეგიონში მომუშავე რამდენიმე არასამთავრობო ორგანიზაციისა და რეგიონის ექვსივე მუნიციპალიტეტის წარმომადგენელი ერთიანდება.

„განვიხილავთ თითოეული ადამიანის პრობლემას და მაქსიმუმს გავაკეთებთ მათ დასახმარებლად“, - ამბობს იურისტი თამარ გიორგაძე.

[თამარ თოთაძე, ახალციხე]