ახალციხეში ადამიანის უფლებების დაცვის საკითხებზე იმსჯელეს

ადამიანების უფლებების დაცვის თემაზე გამართულ შეხვედრას არასამთავრობო ორგანიზაციებისა და ადგილობრივი თვითმაართველობის წარმომადგენლები ესწრებოდნენ.

ღონიძიებას, ადამიანის უფლებათა დაცვის სამდივნოს უფროსი ნატალია ჯალიაშვილი და პარლამენტში საგარეო ურთიერთობების კომიტეტის თავმჯდომარის მოადგილე დიმიტრი ცქიტიშვილი უძღვებოდნენ.

მათ, ადამიანის უფლებების დაცვის ეროვნული სტრატეგიისა და სამთავრობო სამოქმედო გეგმის შესახებაც ისაუბრეს. ძირითადად ყურადღება კი ეროვნული, ეთნიკური, ასევე რელიგიური უმცირესობების უფლებების დაცვაზე გაამახვილეს.

„ეს იყო საინფორმაციო სახის შეხვედრა, რომელიც მიზნად ისახავს, რეგიონული კომუნიკაციის გაძლიერებას იმ ადამიანებთან, რომლებიც ადამიანის უფლებებზე მუშაობენ. გვინდა რომ რეგიონებშ ასეთი ადამიანები კიდევ უფრო აქტიურად ჩაერთონ იმ საკითხებზე მუშაობაში, რაზეც ჩვენ ვამახვილებთ ყურადღბას“, – ამბობს ადამიანის უფლებათა დაცვის სამდივნოს უფროსი ნატალია ჯალიაშვილი .

მისი თქმით, 10 თვის განმავლობაში მსგავსი ტიპის შეხვედრები საქართველოს 10 ქალაქში გაიმართება: „ასევე გაკეთდება გადაცემები და განხორციელდება სხვადასხვა აქტივობები“.

ადამიანების უფლებების შესახებ შეხვედრა, პროექტის – „ადამიანის უფლებების საკითხებზე ინფორმაციის გაცვლის პროცესის გაუმჯობესება ცენტრსა და რეგიონებს შორის“ ფარგლებში ჩატარდა. ეს ღონისძიება დემოკრატიული ჩართულობის ცენტრების მიერ აღმოსავლეთ–დასავლეთის მართვის ინსტიტუტის პროექტის „კანონის უზენაესობის მხარდაჭერა საქართველოში“ ფინანსური მხარდაჭერით და ადამიანის უფლებათა დაცვის სამდივნოსთან თანამშრომლობით ხორციელდება.


[ლუბა გიორგაძე, ახალციხე]