“რეგიონის განვითარება ჩვენი პრიორიტეტია”

ახალციხის ”დემოკრატიული ჩართულობის ცენტრში” გამართულ შეხვედრაზე ფონდის ხელმძღვანელმა ორგანიზაციის საქმიანობის შესახებ ისაუბრა. ირაკლი ჟორჟოლიანმა ყურადღება იმ პრიორიტეტებზე გაამახვილა, რომელიც მიმდინარე წელს სსიპ ”ბავშვთა და ახალგაზრდობის განვითარების ფონდმა” დაასახელა. შეხვედრას არასამთავრობო ორგანიზაციების წარმომადგენლები ესწრებოდნენ.

”ჩვენი მიზანია რეგიონის ახალგაზრდებს საჭირო ინფორმაცია მივაწოდოთ, რათა სამოქალაქო საზოგადოების ფორმირების პროცესში გააცნობიერონ საკუთარი მნიშვნელობა და ამ კუთხით იაქტიურონ. მათ შეუძლიათ დაფინანსება მიიღონ იმ პროექტში, რომელსაც თვითონ ჩათვლიან საჭიროდ”,-განაცხადა ფონდის დირექტორმა ირაკლი ჟორჟოლიანმა.

სსიპ ”ბავშვთა და ახალგაზრდობის განვითარების ფონდმა” პირველი საგრანტო კონკურსი 2013 წლის თებერვალში გამოაცხადა. კონკურსი 27 თებერვალს დაიწყო და 19 მარტამდე გაგრძელდება. მასში მონაწილეობის მიღება ნებისმიერ არასამეწარმეო არაკომერციულ იურიდიულ პირებს შეუძლიათ.

”პროექტი ჩვენს მიერ დასახელებულ პრიორიტეტებს უნდა შეესაბამებოდეს და არ აცდეს ფონდის საქმიანობას. ამავე დროს, უნდა იყოს გრძელვადიან პერსპექტივებზე ორიენტირებული და თანხების გაცემა მიზნობრივად უნდა ხდებოდეს. ჩვენი ფონდი ერთადერთი ფონდია ქართულ რეალობაში, რომელიც თანხებს ახალგაზრდულ ორგანიზაციებზე გასცემს”,-განმარტავს ჟორჟოლიანი.

მსგავსი შეხვედრები საქართველოს მასშტაბით სხვადასხვა მუნიციპალიტეტებში იმართება. ახალციხის შემდეგ სსიპ ”ბავშვთა და ახალგაზრდობის განვითარების ფონდი” შეხვედრას ქუთაისსა და ზესტაფონში გამართავს.

[თინათინ ზაზაძე, ახალციხე]