რეგიონში მომუშავე არასამთავრობოებისთვის საგრანტო კონკურსი გამოცხადდა

აღმოსავლეთ–დასავლეთის მართვის ინსტიტუტის წარმომადგენლები ACCESS-ის პროექტის ფარგლებში ახალციხეში მომუშავე არასამთავრობო ორგანიზაციებს შეხვდნენ და მოქალაქეთა ჩართულობის საგრანტო კონკურსთან დაკავშირებით ინფორმაცია მიაწოდეს. საინფორმაციო შეხვედრა "ახალციხის დემოკრატიული ჩართულობის ცენტრში" შედგა.

"შეხვედრის მიზანი იყო არასამთავრობო ორგანიზაციებისთვის მიგვეწოდებინა ინფორმაცია საგრანტო კონკურსის შესახებ, რომელიც რეგიონებისთვის გამოცხადდა. მათ აქვთ საშუალება, რომ შემოიტანონ განაცხადი და მიიღონ გრანტები, იმისთვის, რომ იმუშაონ ქალაქისთვის და რეგიონისთვის მნიშვნელოვან საკითხებზე. რა იქნება ეს მნიშვნელოვანი საკითხები, ამაზე ქალაქის მაცხოვრებლებთან უნდა შეთახმდნენ", – ამბობს ACCESS-ის პროგრამის ხელმძღვანელი თამარ ქაროსანიძე.

მისივე თქმით, არასამთვრობო ორგანიზაციების წარმომადგენლებს აქვთ თავისუფალი არჩევანი თუ რაზე მოამზადებენ პროექტს, თუმცა არსებობს გარკვეული მითითებებიც.

"იმის გამო, რომ დღეს თვითმმართველობის რეფორმა მიმდინარეობს და კანონმდებლობით ახალი მოთხოვნაა ყველა მერიასთან იყოს სამოქალაქო მრჩეველთა საბჭოები შექმნილი, ჩვენი ერთ–ერთი რეკომენდაციაა, არასამთავრობოებმა იმუშაონ იმაზე, რომ ეს საბჭოები იყოს ქმედითი და ეფექტური, ან იმუშაონ იმაზე, რომ ბიუჯეტირების პროცესი იყოს უფრო გამართული. მაგრამ თუ ისინი ჩათვლიან, რომ სხვა საკითხები არის უფრო პრობლემური, შეუძლიათ სხვა კუთხით შემოიტანონ განაცხადი", – ამბობს თამარ ქაროსანიძე.

კონკურსი უკვე გამოცხადებულია და განაცხადების მიღების ბოლო ვადა 24 დეკემბერია. აღნიშნული კონკურსის ფარგლებში საქართველოს მასშტაბით სულ ოთხი გრანტი უნდა გაიცეს, თუმცა თამარ ქაროსანიძის თქმით, ახალციხეს, ქუთაისსა და ბათუმს პრიორიტეტი მიენიჭება.

[თამარ თოთაძე, ახალციხე]