ახალციხეში ადამიანის უფლებათა დაცვის 2014–2020 წლების სტრატეგიაზე იმსჯელეს

საქართველოს მთავრობის ადმინისტრაციის ადამიანის უფლებათა დაცვის სამდივნო სამცხე–ჯავახეთის მუნიციპალიტეტების ადგილობრივი თვითმმართველობისა და რეგიონში მოქმედი არასამთავრობო ორგანიზაციების წარმომადგენლებს შეხვდა.

„აღნიშნული შეხვედრები პირველ რიგში ემსახურება არსებული დოკუმენტების – ადამიანის უფლებათა დაცვის ეროვნული სტრატეგიის და სამთავრობო სამოქმედო გეგმის შესახებ ინფორმაციის მიწოდებას. ასევე გვინდა მოვისმინოთ ადგილობრივი თვითმმართველობისა და არასამთავრობო ორგანიზაციების წარმომადგენლებისგან რეგიონის პრობლემების შესახებ“, – განაცხადა მთავრობის ადმინისტრაციის ადამიანის უფლებათა დაცვის სამდივნოს უფროსმა ნატალია ჯალიაშვილმა.

შეხვედრა კითხვა–პასუხის რეჟიმში წარიმართა.

„ჩვენ ძალიან ბევრი რეკომენდაციები და მნიშვნელოვანი შენიშვნები გვაქვს, ეს ალბათ უნდა მოხდეს სინქრონში, ხელისუფლებამ, პალამენტმა, სხვადასხვა საერთაშორისო არასამთავრობო ორგანიზაციებმა ერთად უნდა იმუშაონ. დღეს საქართველოში ყველაზე მეტად ირღვევა შეზღუდული შესაძლებლობის მქონე ადამიანების უფლებები, თუნდაც შეღწევადობის თვალსაზრისით. ასევე ძალიან მაინტერესებს იქნება თუ არა ამ პროცესში ჩართული რეპატრიაციის პრობლემები, რადგან ამ პროცესში სერიოზულად ირღვევა ადამიანის უფლებები“, – ამბობს სამცხე–ჯავახეთის ასოციაცია „ტოლერანტის“ ხელმძღვანელი ცირა მესხიშვილი.

მთავრობის ადმინისტრაციის ადამიანის უფლებათა დაცვის სამდივნოს წარმომადგენლების თქმით, შეხვედრაზე გამოთქმული შენიშვნები და რეკომენდაციები სამთავრობო გეგმის განახლების პროცესში აისახება.



[თამარ თოთაძე, ახალციხე]